Үзән
+9 °С
Болытлы
Барлык яңалыклар
Җәмгыять
12 декабрь 2017, 14:20

Үткәннәрне искә төшердек

“Победа” колхозы үзебезнең районда гына түгел, аннан читтә дә билгеле иде. Хезмәт алдынгылары Мәскәү шәһәренең Кремеленә кадәр барып җиттеләр. Ул гына да түгел, СССРның Югары Советына депутат итеп сайланган эшчеләребез дә булды.

Парторг Р.Н.Абакачев, баш инженер Н.С.Әмирханов, агроном В.М.Галәветдинов, колхоз рәисе В.Ә. Уразгилдин, бригадир М.Х.Латыйпов, икътисадчы Ф.Ә.Латыйпова.
Парторг Р.Н.Абакачев, баш инженер Н.С.Әмирханов, агроном В.М.Галәветдинов, колхоз рәисе В.Ә. Уразгилдин, бригадир М.Х.Латыйпов, икътисадчы Ф.Ә.Латыйпова.
Менә шул үткәннәрне искә төшергәндә күзләрдән яшь бөртекләре килеп чыга. Чөнки бөртекләп җыеп, халык акчасына төзелгән ферма биналары, складлар, гараж­ларның җимерелгәнен күрү бик авыр. Ләкин моның белән бернәрсә дә эшләп булмый - һәр заманның үз агышы, үз сагышы. Иң мөһиме, безнең колхозчыларның бүген сагынып сөйләргә сүзләре бихисап.
Йола буенча, көзнең соңгы аенда авыл хуҗалыгында эшләгән хезмәт кешеләренең зур бәйрәме үткәрелә. Менә шул уңайдан Сахай авыл мәдәният йортына үз бәйрәмнәрен билгеләргә элекке “ Победа” колхозында эшләгән хезмәт кешеләре җыелды. Беренче сүз “Победа” колхозының икътисадын күтәрүгә бар көчен сал­ган, 27 ел колхоз рәисе булып эшләгән Уразгилдин Флюр Әхмәт улына бирелде.
- Бу безнең чын хезмәт бәйрәме, - дип башлады ул чыгышын. - Әлбәттә, бу көн колхозлар тулыканлы яшәгән чорда аеруча зурлап билгеләнә иде. Ул вакытта колхозда эшләр гөрләп барды, халык та яхшы шартларда яшәде. Кемгә нәрсә кирәк, кем нәрсәгә мохтаҗ, ул кеше колхоз идарәсенә килә иде дә, үз йомышын йомышлап, канәгать булып кайтып китә иде. Һәр айның 12сендә без эшчеләргә хезмәт хакы бирдек. Профсоюз линиясе буенча ел саен берничә кешебез ял йортына, шифаханәләргә барып, сәламәтлекләрен ныгытып кайтып, дәртләнеп эшкә тотыналар иде. Хәзер дөнья үзгәрде. Колхозлар бетте. Шулай да, әлеге вакытта да безнең кебек колхозчыларны искә алып, яңартылган мәдәният йортына чакырып, концерт программасы күр­сәткәнгә шатмын һәм рәх­мәтлемен. Бу үсеп килгән буын өчен дә безнең хезмәтне зурлау үрнәге булып тора.
“Туган җирем, рәхмәт сиңа!”- дип аталган әдәби кичәнең сценариясе буенча сүз 1975 елда район күлә­мендә генә түгел, ә республика буенча иң югары уныш - гектарыннан 35,2 центнер ашлык, 395 центнер шикәр чөгендере җыеп алган “Победа” колхо­зының баш агрономы, “Баш­кортстанның атказанган авыл хуҗалыгы хезмәткәре” дигән югары исемгә лаек булган ра­йоны­бызның Почетлы граж­да­нинына Галәветдинов Вәзил Мозафар улына бирелә.
- Бүгенге чыгышымда мин үзем белән гомер буе эшләгән, бүгенге көнне фани дөньядан киткән уңган, тырыш эшчеләр хакында әйтеп үтәр идем. Механизаторлар Барый абзый Камалов, Ленин Ордены кавалеры Гәлиәхмәт абзый Самиков, комбайнчылар Әхәт Якупов, Ягафәр Кабиров, Закария Айбашев, тракторчылар Рамазан Гә­рәев, Тәлгать Сәгыйтов, Рә­шит Зәйнуллин, Талха Рахимколов ал-ял белми хезмәт салдылар. Шоферларыбыз көн­дез башка эштә булсалар, төнлә үстергән уңышны иген кабул итү пунктларына өз­лексез ташып тордылар. Бу уңайдан Наил Латыйпов, Риф­­кать Якупов, Рәмил Төх­вәтуллин, Гомәр Бикташев, Миннигазиз Искән­дәров, Миңлемөхәммәт Халиков, Мәхмүт Гыйззәтул­линнарның исемнәрен әйтеп үтәргә була. Менә шулай бер таңнан икенче таңга тиклем алар юлда булдылар. Шуны әйтеп китәсем килә: мин “По­­бе­да” кол­хо­зының беренче брига­дасы бригадиры Латыйпов Мидхәт Хан улыннан уңдым. Аның хезмәте бәяләп беткесез булды. Форсаттан файдаланып, барыгызга да рәхмәт сүзләре җитке­рәм, - дип сүзен йомгаклады аксакал.
Әлбәттә, Бөек Октябрь революциясен дә искә алмый булмый. Чөнки бу вакыйгага быел 100 ел тулды. Бу уңайдан сүз “ Победа” колхозының баш зоотехнигы, партком секретаре, вакытында Сахай авыл Советы хакимияте башлыгы булып эшләгән Наил Насыйбулла улы Котлыяровка бирелде.
- Алдан сөйләп үткән иптәшләрнең сүзләренә өстәп шуны әйтеп үтәсем килә: дөньяларыбыз яхшы якка үзгәрер ул. Яңадан-яңа техника булыр, басулар югары унышлы культуралар белән чәчелер. Шулай да үткәнне онытырга тиеш түгелбез. Без колхоз өчен генә түгел, ил өчен эшләдек. Нинди генә югары, мактаулы исем­нәргә лаек булмадык. Кайчандыр ферма мөдире булып эшләгән Зөлфәр абзый Баязитов яхшы хезмәте өчен Ленин Ордены белән бүләкләнде. Бу Октябрь революциясенең унай ягы хакында сөйли. Гади эшче балалары югары уку йор­тына укырга кереп, иле­безнең югары урыннарында эшлиләр, - дип, җыелучы­ларны бәйрәм белән котлады.
Бүгенге көнне безнең “Победа” колхозы Шәймо­ратов хуҗалыгы белән кушылып берлектә эшли. Вакытында колхозның партком секретаре булып эшләгән Равил Әбдел­насыйр улы Аба­качевның улы – Дамир Сахай бүлекчәсе белән җитәкчелек итә. Ул да үзенең уй-хисләре белән уртаклашты.
- Быелгы ел безнең өчен бик унышлы булды. Колхозчыларга пай җире өчен 5 центнер ашлык бирдек. Шулай үткәннәрне искә төше­реп, матур кичә уздыруыгызга мин бик шатмын. Барыбыз да без шушы колхоз икмәген ашап үстек. Шулай булгач, аны беребезнең дә онытырга хакы юк, - дип сүзен йомгаклады.
Очрашу кичәсен ямьләп мәдәният йортының үзешчән сәнгатьтә катнашучылары һәвәскәр җырчылары Язилә Хисамова, Сәлимә Хафизова, Урал Бай­назаровның баян моңына кушылып җырлап, эшче­ләрене яшьлек елларына алып кайттылар. Сахай почта бүлекчәсе хат ташучысы Раушания Искәндәрованың моң­лы җыры та­машачы­ларның күнелләренә үтеп керде. Марат Кәбиров, Гөлназ Фәткуллина үзләренең җыр­лары белән тантана сәбәп­челәрен котлады. Сахай авыл мәдәният йорты хезмәткәре Рания Хисамова матур җыры белән кичәгә тагын да ямь өстәде.
Иске Акташ авылы егете, кайчандыр “Победа” кол­хозы­ның икенче бригада бригадиры булып эшләгән Баязит Гыйз­зәтуллин сәхнәне яңгыратып җырлап, тама­шачы­ларның күнелен күтәрде. Тавыш операторы Радмир Хисамов бәйрәм кичәсенә җан өрде.
Таһир Вилданов.
Сахай авылы.
Читайте нас: