Солдатлар хәбәрсез югалмый

Туймазы районының Кандра-Күл буенда урнашкан җәйге сәламәтләндерү лагеренә рес­публиканың 5 шәһәре һәм 7 районыннан барлыгы 22 отряд килде. Безнең районнан “Яшьлек” яшьләр үзәге җитәкчесе - өстәмә белем бирү педагогы Айгөл Яхина, эзләнү отряды әгъзалары - Иске Бәбеч авылыннан Нуриман Шәймәр­дә­нов, Сәвәләйдән Алмаз Әмир­ханов, Иске Кыешкыдан Альбина Хәкимова катнашты.

Балалар биш көн буенча эзләнү эшенең теоретик һәм гамәли материалларын өйрән­деләр, тәҗрибә уртаклаштылар. Әлбәттә, иң төп максат – балаларны тимер детектор ярдәмендә казу эшләрен дөрес алып бару гына түгел, урындагы һәм республика хәрби комис­сариатның архив материаллары белән эшләргә һәм Подольск шәһәрен­дәге оборона министрлыгының үзәк архивына сорау җибәрергә өйрәнү иде.

Сугышта хәбәрсез югалган солдатның язмышы якыннарын борчымый калмый. Республикада гына аларның саны 120 меңгә якын, ә безнең районда меңнән артык кеше хәбәрсез югалган. Укучылар солдатларны эзләү өчен төзелгән интернет-ресурсларда, төрле сайтларда мәгъ­лүматлар буенча эшләргә, аларның наградалары, яралары, нинди частьларда сугышулары, хәрби юлларын кайда тәмамлаулары турында белергә өйрән­деләр. Киләчәктә мондый эшләрне активлаштыру өчен эзләнү отрядлары булган авылларда, мәктәпләрдә җәмәгать кабул итү бүлмәләре ачарга һәм һәлак булган яугирләрнең туганнарыннан электрон төрдә мәгълүматлар белән гариза-анкета кабул итүне планлаштырабыз. Шу­ның өчен дә хәбәрсез югалган солдатның язмышы эзләнү отрядларының эшләренә бәйле.

Слет азагында эзләнү тематикасы буенча конкурслар үткәрелде. Биредә безнең отряд өч номинация буенча грамоталарга лаек булды, ә хәрби төр ярышлар буенча Нуриман Шәймәрдәнов 125 катнашучы арасында пневматик винтовкадан ату һәм АК-74 автоматы макетын сүтеп-җыюда беренче урын яулады

Безнең егет һәм кызлар тәҗрибә туп­лап, күл буенда рәхәтләнеп ял итеп, күтәренке кәеф белән кайттылар.

Зәки Бикбаев, районның “Йолдыз” эзләнү отряды җитәкчесе.