Кырым Республикасының Белогорск шәһәрендә капиталь ремонттан соң район мәдәният йорты ачылды. Чарада БР Мәдәният министры Әминә Шафикова җитәкчелегендәге Башкортстан Республикасы делегациясе дә катнашты. Белогорск районындагы бу куанычлы вакыйга Башкортстан Республикасы ярдәме белән мөмкин булды.
Сәламләү сүзе белән чыгыш ясап, Кырым Республикасы Башлыгы Сергей Аксёнов Башкортстан Республикасы Башлыгы Рөстәм Хәмитов һәм Башкортстан Республикасы Хөкүмәте, БР Мәдәният министры Әминә Шафиковага күрсәткән ярдәм өчен рәхмәт белдерде һәм реконструкциядән соң мәдәният йортын ачу муниципаль район власте һәм Башкортстан Республикасы Хөкүмәте хезмәттәшлегенең нәтиҗәсе булып тора, дип ассызыклады.
- Башкарылган эшләр өчен ихлас рәхмәтемне белдерәм. Мәдәният йортын ачу шәһәр халкына яңа мөмкинлекләргә һәм иҗади уңышларга юл ачар, дип ышанам, - диде Кырым Башлыгы.
Фәнзил Фәез улы Русия халыклары арасындагы бердәмлекне ныгыту һәм этномәдәниятне үстерү мәсьәләләре буенча “Түгәрәк өстәл” эшендә катнашты.
Шуны да билгеләп үтәргә кирәк, бу көнне “2020 елга кадәр Кырым Республикасы һәм Севастополь шәһәренең социаль-икътисадый үсеше” федераль максатлы программа чикләрендә Белогорск районында тантаналы шартларда яңа мәктәпкәчә белем бирү учреждениеләре дә үз ишекләрен ачты.
Шулай ук муниципаль район хакимияте башлыгы Фәнзил Чыңгызов Белогорск шәһәрендәге 300 урынга исәпләнгән “Әкият” һәм Зуя касабасында 170 урынлык “Йәйгор” балалар бакчаларын ачу уңаеннан тантаналарда катнашты.
Җыелучыларга сәламләү сүзе белән Кырым Республикасының Дәүләт Советы Рәисе Владимир Константинов мөрәҗәгать итте. Ул Белогорск районы көннән-көн күркәмләнә, яңа объектлар файдалануга тапшырыла, күп еллар гамәлгә ашырылмаган мәсьәләләр уңай хәл ителә, диде.
- Киләчәккә ышаныч барлыкка килә, үзебезне бөек илдә яшәвебезне, дөрес юнәлештә баруыбызны аңлыйбыз, - диде Дәүләт Советы Рәисе.
Барлык катнашучыларны Башкортстан Республикасы Башлыгы Рөстәм Хәмитов һәм Башкортстан халкы исеменнән Башкортстан Республикасының мәдәният министры Әминә Шафикова сәламләде.
- Гомум көч белән бүген Белогорск районында бер дигән мәдәният учагы булдырылды. Түгәрәк эшләре алып бару, үзешчән сәнгать осталарының чыгышы өчен биредә барлык шартлар да тудырылган. Бу сәхнәдә иң яхшы артистлар чыгыш ясарга лаеклы, - диде мәдәният министры.
(Кырым Республикасы Башлыгының мәгълүмат һәм матбугат хезмәте идарәлеге материалларыннан алынды).