“Йолдызлы” чыгарылыш

Мәктәп китапханәчесе Р.Ш.Әхтәмованың архивында бөртекләп җыелган фоторә­сем­нәрне, төрле елларда мәктәпне тәмамлаган укучыларның анкеталарын һәм хати­рәләрен карап, укучыларның лаеклы белем алуына, ә укытучы­ларының абруйлы булуына инанасың.

Мәктәпнең һәр укучысы аерым тарих. Ләкин 1966 елда ул аеруча үзенчәлекле була. Бу елда 10 һәм 11нче сыйныфларны тәмамлау турында өлгер­гәнлек аттестаты алган 85 укучының кү­бесе төрле тармакларда югары үрләр яулады.

Чыгарылыш укучылары исемлегендә бертуганнар да байтак. Әйтик, абыйлы-энеле Рафаил һәм Наил Нурмө­хәммәтовлар. Тәүгесе – район һәм мәктәбе өчен байтак изге эшләр башкарган “Лениногорскнефть” нефть һәм газ чыгару идарәлеге начальнигы булса, абыйсы – Наил Сәет улының да хез­мәт биографиясе ифрат бай. Ул байтак еллар Татарстан­ның “Сулеевнефть” җәм­гыятендә төрле вазыйфаларда эшләде, КамАЗ, КПСС һәм Елабуга шәһәр коми­тетының комсомол һәм партия оешмаларына җи­тәкчелек итте, Әлмәт шә­һәрендәге “Татнефтехим” җәмгыятенең социаль өл­кәсе өчен җавап бирде.

Әхтәмовлар нәселендә дә билгеле кешеләр байтак. Фәнил Барый улы бертуган апасы Рафика белән мәк­тәпне бергә тәмамлыйлар. Үзенең хезмәт юлын ул физкультура укытучысы булып башлый. 1973 елда язмышын Уфа тимер-бетон заводы белән бәйли һәм формовщиктан предприятие директорына кадәр үрли. Рафика Барый кызы үзен сәла­мәтлек саклау өлкәсенә быгышлады. Медицина училищесын тәмамлаганнан соң, Уфа шәһәренең 17нче санлы бала тудыру йортында акушерка, соңыннан 10нчы шәһәр клиник дәваханә­сендә өлкән шәфкать туташы булып эшли. “БРның атказанган медицина хез­мәткәре” дигән исемгә лаек була.

Фәнис Сәхиулла улы Яхин өчен дә медицина тор­мы­шының мәгънәсенә әверелә. БРның атказанган табибы, югары категорияле белгеч 30 елга якын Республика онкология диспансерында эшли. Ә Айрат Мәх­мүт улы Яхин гомерен фән белән бәйли. Башкорт дәү­ләт университетының физика-математика факультетын тәмамлаганнан соң Октябрьский шәһәрендәге Фән­ни тикшеренү институтына эшкә җибәрелә һәм анда өлкән фәнни хез­мәткәр булып хезмәт сала. Техник фәннәр кандидаты.

Эльза Равил кызы Мө­хәм­мәтҗанова да Башкорт дәүләт авыл хуҗалыгы институтының ветеринария факультетын һәм Скрябин исемендәге ветеринария академиясен тәмам­лаганнан соң, кандидатлык, авыл хуҗалыгы маллары патологиясе, онкология һәм морфология өлкәсендә докторлык диссертациясен яклый. Бүгенге көндә ул Башкорт дәүләт аграр университе­тының ветеринария факультеты профессоры.

Гәү­һәр Нурулла кызы Кәри­мова да язмышын шул ук уку йорты белән бәйли. Башкорт дәү­ләт университетында биолог-биохимик белгечлеге алып, Мәскәү дәүләт уни­верситетының генетика һәм селекция кафедрасы каршындагы аспирантурада укуын дәвам итә. Биология фәннәре кандидаты.

Михаил Иванович Ми­неевның да хезмәт биографиясе бай. Башкорт дәүләт авыл хуҗа­лыгы институтын тәмам­лаганнан соң фәнни хезмәткәр булып эшли. Авыл хуҗалыгы фәннәре кандидаты. “Бөре” тәҗри­бә-җитештерү хуҗа­лыгы, Бөре икмәк комбинаты, “Башкорт” фәнни-җитеш­терү бер­ләшмәсенә, респуб­лика­ның Авыл хуҗа­лыгы министрлыгы каршындагы азык-төлек сә­нәгате идарә­легенә җитәк­челек итә. 90нчы еллар азагында – 2000 еллар башында Уфа районы хакимияте башлыгы, республика Премьер-министр урынбасары вазыйфаларында эшли.

Район үзәгендәге ике мә­гариф учреждениесе - 2нче санлы мәктәп һәм гимназия дә республикада гына түгел, аннан читтә дә танылу алган үзе­нең укучылары белән горурланырга хакы бар.

Тәлгать Мөхәммәтҗанов.