Үзән
+23 °С
Болытлы
Барлык яңалыклар
Җәмгыять
11 гыйнвар 2019, 12:30

Күңел җылысы бүләк иттеләр

Ибраһим авылындагы “Виктория” спорт-сәламәтләндерү лагере яңа ел каникуллары чорына имин булмаган гаиләләрдәге 40тан артык баланы үзенә кабул итте. Бу бәйрәм көннәре аларның күңелендә бик озак сакланачак, чөнки Э.Р.Гатиятуллин җитәкчелегендәге лагерь хезмәткәрләре балаларның ялы күңелле һәм файдалы үтсен өчен барлык көчен сала. Биредә көн саен спорт һәм күңел ачу чаралары оештырыла, төрле түгәрәкләр эшли. Димәк, балаларга сәләтләрен ачу һәм үстерү өчен дә барлык мөмкинлекләр бар. Биш тапкыр тукландыру, көн аралаш авыл мунчасы керү, шулай ук экскурсияләр һәм походлар – балаларга менә дигән яңа ел бүләге булды.

Балалар һәм үсмерләр спорт мәктәбе белән берлектә оештырылган спорт чарасы аларга аеруча ошады. Анда муниципаль район хакимияте башлыгы А.Ф.Сабиров, социаль мәсьәләләр буенча урынбасары Ф.Н.Макеева, район Советы секретаре А.З.Сәетгалин һәм башкалар катнашты. Бу көнне бераз салкын булуга карамастан, барысы да Кызылгы күле бозы өстендә рәхәтләнеп күңел ачты: капчык киеп ярыштылар, аркан тарттылар, битләре алсуланганчы таудан шудылар. Соңыннан мини-футбол буенча матч үткәрелде. Уеннар бик күңелле һәм шул ук вакытта киеренке килеп чыкты. Ни генә дисәң дә, малайларга кунаклар белән көч сынашырга туры килде. Ә бу алар өчен икеләтә шатлык.
Ерактан Кыш бабай белән Карсылуны күргәч, балаларның кәефләре тагын да күтәрелеп китте. Яңа елда аларның кулыннан күчтәнәч алу турында кем генә хыялланмый икән?!
Гомумән, байтак уңай тәэссоратлар калдырган бу яңа ел каникулларын балалар онытмаячак. Биредә аларның һәр көне шатлыктан торсын һәм йөзләрендә бәхетле елмаю балкысын өчен зур тырышлык салдылар. Иң мөһиме, яңа ел әкияте тәмамланмасын, аларның әти-әниләре үзләренең хатасын танып, туры юлга бассыннар һәм балаларын игътибар һәм хәстәрлек белән уратып алсын иде, дип телисе килә.
Эльвира Ямалетдинова.
Автор фотолары.
Читайте нас: