Соң булса да, уң булсын!

Узган якшәмбе Уфа “Нур” татар дәүләт театрында “Татар халкының үсеш стратегиясе” эскизын Башкортстан Республикасының киң җәмәгатьчелегенә тәкъдим итү җыены узды. Фикер алышуда безнең район делегациясе дә катнашты.

Милләттәшләр җыелган җирдә

Әйткәндәй, милләтнең үсеш стратегиясе эскизы буенча очрашулар февраль аеннан Русиянең төрле төбәкләрендә үткәрелә башлаган. Күптән түгел ул Екатеринбургта Урал татарлары форумында һәм Дондагы Ростов шәһәрендә оештырылган.

Уфа шәһәрендәге “Нур” театрының зур залы да халык белән шыгрым тулы иде. Җыелучылар алдында Башкорт­станның халык шагыйре Марат Кәримов, Татарстанның халык шагыйре, якташыбыз Роберт Миңнуллин һәм Татарстан премьер-министры урынбасары, Бөтен­дөнья татар конгрессының Милли шура рәисе Вәсил Шәйхразиев чыгыш ясады.

Стратегия киләчәккә юлны билгели

- Татар халкының үсеш стратегиясе инде күптән язылырга тиеш иде. Соң булса да, уң булсын. Татар рухы ул мәктәп­тән түгел, ә бишектән башлана, бишек җырлары белән бирелә, - диде чыгышын­да Марат Кәримов, телебезнең байлыгын чагылдырган шигырьләрен укып. Якташларын сагынып кайткан Роберт Миң­нуллинның чыгышы да эчтәлекле булды. Ул бу Стратегиянең халкыбызны уяту, рухландыру өчен бик яхшы гамәл, дип исәпли.

Вәсил Шәйхразиев Конгрессның 2018 елгы эшчәнлегенә нәтиҗә ясап, быел планлаштырылган чаралар турында сөйләгәннән соң “Татар халкының үсеш стратегиясе” эскизын тәкъдим итте.

- Стратегия - ул татар халкын бер­ләштерүче документ. Аны тормышка ашыру да бездән тора, бу һәркайсыбыз көн­дәлек эшли торган эш. Әлеге доку­ментның татар телен саклау, үстерүдә әһәмияте зур булачак , - диде Вәсил Гаяз улы, һәм аны булдыруда һәркемне катнашырга чакырды.

- Тырышкан табар, ташка кадак кагар, дияргә ярата халкыбыз, – дип сүзен дәвам итте Милли шура рәисе. – Бу документ төрле яклап: халкыбызның мәдәниятен, динен, телен, гореф-гадәтләрен, милли ризыкларын, киемнәрен үз эченә алачак. Милләтне саклауда туган тел иң мөһим фактор булса да, без икенче кыйммәтләр турында да онытмаска тиеш. Халык җырын белгән кеше ана телен онытмый инде ул. Ризык пешергәндә «өчпочмак», «гөбәдия» дип сөйләшә икән, бу да телне саклауның бер алымы.

Программа булгач, телне үстерү юнәлеше өчен республика үзе генә эшләп калмаячак, федераль бюджеттан да финанслар җәлеп итәргә мөмкинлек туачак.

Дөньяда 10 миллионга якын милләт­тәшебез яши. Соңгы халык санын исәпкә алу буенча, Русиядә 5 миллион 300 мең татар исәпләнә. Милләт буларак бер­ләшеп, бер-беребезне кайгыртып, дустанә яшәү – безнең төп максат, - диде ул документның асылын аңлатып.

Һәр фикерне исәпкә алып

Чарада катнашучылар да үз фикер­ләрен җиткерде. Икътисад фәннәре докторы Касыйм Йосыпов, мәсәлән, Башкортстанга Татарстан җитәкчелеге гади төбәккә караган кебек кенә карарга тиеш түгел, биредә татарлар күп яши, Башкорт­станда Бөтендөнья татар кон­грессының филиалын булдырырга кирәк, - дип белдерде. Шулай ук милли горурлыкны күтәрүгә юнәлтелгән тәкъдимнәр яң­гы­рады. Әйткәндәй, бу көнне Страте­гия­нең эскизы гына тәкъдим ителде. Мас­сакүләм мәгълүмат чаралары, Интернет челтәре аша һәркем үзенең теләк-тәкъ­димнәрен, фикерләрен Бөтендөнья татар конгрессына язып җибәрә ала.

Чараның икенче өлешендә “Нур” татар дәүләт театры артистлары заманча сулыш өрелгән “Башмагым” спектаклен тәкъдим итте.

Эльвира Ямалетдинова.

Автор фотолары.