Оста куллы егетләр тимергә дә “җан” өрә

Прибельский авылында яшәүче Андрей Васильев һәм Ирек Хәсәнов сафтан чыккан автомобильләрнең детальләреннән машина җыйганнар һәм аны “Багги” дип атаганнар.

Андрей Уфа шә­һә­ренең 68нче һөнәр­челек училищесында автослесарь һөнәре алып чыккан. Аңа 25 яшь, фура водителе булып эшли. Ә 28 яшьлек Ирек Автотранспорт колледжын тәмамлап, автомеханик белгечлеге алган. Бүгенге көндә “Спецнефтегаз” җәм­гыя­тендә экскаваторчы булып эшли. Аларның икесе дә балачактан техника белән мавыга, буш вакытларында аларны сүтеп-җыю, ремонтлау белән мәш киләләр. “Багги” җыю идеясе кемнең уена килгән­дер, алар хәтер­ләми, ләкин нәрсәдер ясап карау теләге һәрвакыт булган.

- “Багги” – ВАЗ­ның тугызынчы моделе һәм “ГАЗель” узеллары һәм деталь­лә­реннән җыелган зур булмаган автомобиль. Гаражда череп берткән иске генә ВАЗ-2109 машинасы утыра иде. Без аны теркәүдән төшер­дек тә, алмаш частьларын ясаячак машина өчен файдаланырга булдык.

Эшне без узган ел­ның ноябрендә башлаган идек. Торбалардан ясалган каркас сызымын интернетта таптык. “Багги”ның двигателе артта урнашкан. Киләчәктә без аны камилләштерергә, иске алмаш частьларын яңага алмаштырырга, кабинасын эшләп бе­тетергә, “обшивка”сын һәм кайбер деталь­ләрен буярга уйлыйбыз, - ди Андрей.

Бу гына да түгел, егетләр минитрактор җыя башлаган, ә җәйгә картинг (ярыш машинасы) һәм сазлыкта йөри торган җайланма ясарга ниятлиләр.

Милена Шәймәрдәнова.

Автор фотосы.