Хезмәтенә күрә хөрмәте

Фәнисә Әхмәт кызы Арслан авылында туып-үскән. Мәктәпне тәмамлаганнан соң, бухгалтер белеме ала. 1973 елда хезмәт эшчәнлеген районның исәпләү станциясендә икътисадчы буларак башлый. 1990 елның маенда “Хезмәт даны” гәзите редакциясенә эшкә урнаша һәм шуннан бирле аның тормышы киң мәгълүмат өлкәсе белән тыгыз бәйле.

Катлаулы 1990 елларда редакция төрле авырлыклар белән очраша. Әмма район гәзите җитәкчелеге һәм бухгалтеры чыгымнарны мөмкин кадәр киметеп, үзләрендә типография булдырып, хезмәткәрләрнең эш хакларын тиешле дәрәҗәдә саклап кала алалар.

2000 елларда редакция кирәкле компьютер техникасы сатып ала, укулар үткәрә. Фәнисә Бәкирова район гәзитләре бухгалтерлары арасында беренчеләрдән булып компьютер программаларын үзләштерә һәм исәп алып баруны электрон формага күчерә.

Фәнисә Әхмәт кызының ярдәмендә редакциянең партнерлар даирәсе киңәйтелә, төрле ведомстволар һәм оешмалар белән мәгълүмати хезмәттәшлек җайга салына. Финанс күрсәткечләре буенча Кырмыскалы мәгълүмат үзәге республикада алдынгы урыннарны били һәм шулай булып кала бирә.

Эшләү дәверендә Фәнисә Әхмәт кызы үзен намуслы, тәртипле, үз компетенциясендәге теләсә нинди мәсьәләне хәл итү өчен җаваплылыкны үз өстенә алырга сәләтле хезмәткәр буларак танытты.

Хөрмәтле хезмәттәшебезне югары бүләге белән чын күңелдән котлыйбыз. Фәнисә Әхмәт кызы, тырыш хезмәтегез өчен рәхмәт. Сезгә һәм якыннарыгызга сәламәтлек, бәхет, озын гомер телибез.

Әлфия Әхмәдуллина.