Җыр-моң, шатлык бүләк иттеләр

Шул көннәрдә “Өмет” гәзите редакциясе танылган популяр артистлар белән берлектә мәдәният йорты залына җыелган Сахай, Иске Шәрәй һәм Иске Акташ авыллары халкына зур бәйрәм бүләк итте. 2007 елда ук нигез салынган “Моңнар кайтсын авылга” акциясе, ниһаять, безнең районга да килде.

Бу күркәм чара мәдәният йорты фойесында оештырыл­ган “Гәзиткә язылучылар көне” акциясеннән башланып китте. Шунысы куанычлы, тамаша башланганчы гәзит-журналларга язылучылар бихисап булып чыкты. Бер сәгатькә якын вакыт эчендә район һәм республика басмаларына дистәләгән кеше язылып та өлгерде. Ә соңыннан квитанция тутыручылар “Өмет”, район гәзитләре һәм “Русия почтасы” тарафыннан оештырылган лотерея уенында катнашып, бик шәп бүләкләргә ия булды.

Тамаша залы халык белән шыгрым тулган иде. Шулай булмыйча, бездә, чынлап та, җыр-моң сөюче халык яши бит. Бу уңайдан Иске Шәрәй һәм Иске Акташ авыллары халкы авыл биләмәсе башлыгы Р.Р.Хөснетдиновка рәхмә­тен җиткерде. Шундый зур тамашалардан күршеләр читтә калмасын өчен Ришат Равил улы автобус җибәрә. Менә бу көнне дә авыл халкы гәзиткә дә язылды, күңелле тамаша да карады, рәхәт­ләнеп аралашты да.

Чараны ачып, район хакимияте башлыгының социаль мәсьәләләр буенча урынбасары И.Ә.Галиәхмәтова Сахай авыл биләмәсендә яшәү­челәрнең тормыш-көнкүреше белән таныштырды, аларның эшсөяр, тырыш, кунакчыл булуын билгеләде. Күптән түгел авылда башлангыч мәктәп ачылуы, бу уңайдан республика җитәк­чесе Р.З.Хәми­товның килүе турында әйтте. Кунакларга рәхмәтен белдереп, “Өмет” гәзитенең җәм­гыятьнең рухи үсешенә, милли йолаларны тергезүгә һәм татар телен саклауга зур өлеш кертүен, шулар белән бергә сәясәтне, икътисадны да киң яктыртуын, һәр санында уку­чыда кызыксыну уяткан мәсьәлә­ләр, бигрәк тә яшь­ләрне борчыган көнүзәк проблемалар күтәрелүен билге­ләде һәм киләчәктә районда бу басманы тагын да күбрәк кеше алдырачак, дигән өметен белдерде.

Чынлап та, бездә бу басманы яратып укыйлар, ул халыкның фикердәше, сер­дәше, якын дусты, яр­дәм­чесе, дип ышанычлы әй­тер­гә мөм­кин. Басманың мө­хәр­рире Р.Г.Ногманов белде­рү­енчә, берничә ел элек редак­циягә Агыйдел буенда урнашкан авылда суга интегүләре турында язылган хат килеп төшә. Һәм гәзит хезмәткәр­ләре авыл Советы белән элемтәгә кереп, бу проблеманы хәл итүдә үз өлешен кертә. Бу очрашуда да Рәдис Гыйльван улы халыкның көнкүреше белән кызыксынды, милли басмаларның язмышы өчен борчылуын белдерде, телебезне, йолаларыбызны саклау мәсь­әләсен күтәрде, килә­чәктә дә безнең якта “Өмет”не алдыручылар саны тагын да артыр, дигән ышанычын белдерде. Шулай ук Илдар Ямалетдинов җитәкчелегендәге Кырмыскалы почтамты хез­мәткәр­ләренә рәхмәтен җит­кереп, Сахай авылы почтальонкалары Миңниса Вәлиева һәм Раушания Искәндәровага диплом белән истәлекле бү­ләкләр тапшырды.

Тел мәсьәләсе байтак популяр җырлар авторы Мидхәт Әбделмановны да нык борчый. Мәктәпләрдә татар теле­нең бетеп баруына көенүен белдереп, балаларда телгә сөюне гаиләдән башларга кирәклегенә басым ясады. Бу уңайдан “Өмет” гәзитенә рәх­мәтен әйтте, чөнки анда каләм тибрәтүче балалар өчен махсус кушымта – “Чаткылар”да алар үзләренең тәүге иҗади җимешләрен бастырып чыгара ала.

Ә бераздан зал тутырып килгән тамашачыларны популяр җырчылар - Башкорт­стан­ның атказанган артисты Ришат Галиханов, яшь башкаручылар Илнур Вәлитов, Әлфия Әбделманова моң дәрьясына алып кереп китте.

Кичәдә башкала артистлары белән бергә Сахай авылы мәдәният йортының үзешчән артистлары – Зәлия Рамазанова, Олег Хашаев та чыгыш ясап, якташларына моңлы җырларын бүләк итте.

Чара ахырына да якынлашты, ләкин тамашачы­лар­ның кул чабуыннан артистларны җибәрәсе килмәве ачык күренеп тора иде. Алар да, үз чиратларында, бу очрашуның соңгысы булмаячагына өмет биреп, киләчәктә тагын да концерт программалары белән килергә вәгъдә итте. Авыл мәдәният йорты җитәкчесе Таһир Вилданов кунакларга рәхмәт сүзләре белән мөрә­җәгать итте. Республика басмасы белән дистә еллар дәвам иткән дуслык җепләренең ки­ләчәктә тагын да ныгуын теләп, “Өмет” гәзите хәбәр­че­се Руфина Таҗиевага “Кырмыскалы: гасырдан-гасырга” дигән район тарыхы чагылдырылган китапны бүләк итте.

Бу чара, чынлап та, авылга җыр-моң алып кайтты. Ул һәркемгә рухи байлык, күтә­ренке кәеф һәм киләчәккә якты өмет бүләк итте. Кунаклар халкыбызның ихласлыгына, бердәмлегенә, җылы кар­шы алып, көчле алкышлар белән озатуларына сөенсә, кырмыскалылар өчен бу зур бәйрәм булды. Мондый очра­шуларның киләчәктә дә кабатланып торуына өмет итеп каласы килә.

Эльвира Ямалетдинова.

Автор фотолары.