Яшьләр көрәшеп чыныга

Ярышлар башланыр алдыннан спортчылар, тренерлар һәм тамашачыларны муниципаль район хакимияте башлыгы Ф.Ф.Чыңгызов сә­ламләде һәм барсына да күтәренке кәеф, ә көрәш­челәргә - җиңүләр теләде. Шулай ук Фәнзил Фәез улы бу турнирның әһәмиятен һәм көрәшнең Миңлегали Шәйморатовның туган ягында үткәрүнең мөһим­леген билгеләде.

Республиканың яшьләр сәясәте һәм спорт министры урынбасары А.В.Новиков, мәдәният һәм милли сәясәт министры урынбасары Р.Р.Ал­тын­баев, билбаулы көрәш федерациясе президенты В.И.Ильясов һәм башка мәртәбәле кунаклар чараны югары дәрәҗәдә оештырганнары өчен район хакимиятенә рәхмәт белдереп, чараны ачып җибәр­деләр.

Ярышлар ике көн дәва­мында барды. Тәүгеләрдән булып келәмгә иң яшь спортчылар чыкты. Арытабан көрәшчеләр авырлык категорияләре буенча үзлә­ренең көчләрен һәм чыдамлылыкларын күрсәттеләр. Келәмдә көрәш кызганнан-кыза барды. Һәр көрәшчегә шактый көч түгәргә туры килде. Шулай итеп, 70 килограммга кадәр авырлык категориясендә уңыш Кырмыскалы авылыннан Радмир Самиков һәм Артур Хәми­дуллинга елмайды. Радмир чак кына көчлерәк булып, Артурны икенче урынга калдырды. Призлы урыннарны шулай ук район үзәгеннән Руслан Карпов, Дамир Насыйров, Михаил Юдин, Азат Абдуллин, Богдан Данилов яу­лады. Хәзер исә җиңүче­ләргә республика данын Русия чемпионатында якларга туры киләчәк. Анда да аларга уңыш елмайсын иде.

- Шунысы куанычлы, бу спорт төре белән шөгыль­ләнергә теләүчеләрнең саны елдан-ел арта. Спортчылар техник яктан да көчлерәк, шуңа турнирлар да мавыктыргыч үтә, - ди физик культура һәм спорт буенча баш белгеч Вадим Канбәков.

Кунаклар Миңлегали Шәйморатовның туган авылына барып, музейда булдылар, легендар дивизия командиры турында 3-D фильм карадылар һәм һәй­кәленә чәчкәләр салдылар.

Җиңүчеләргә медальләр, грамоталар һәм кыйммәтле бүләкләр тапшырылды. Чараны оештыруда “Айсберг” җәмгыяте (“Ихлас” сәүдә үзәге) директоры Роберт Йосыпов иганә ярдәме күр­сәтте.

Марсель Рәшитов. Автор фотолары.