Үзән
+26 °С
Болытлы
Барлык яңалыклар
Бәйрәм кайтавазы
3 апрель 2018, 11:31

Нәүрүз белән җиргә яз килә

Бүгенге көндә милли бәйрәмнәрне, борынгы йолаларны тергезү, саклау һәм киләсе буынга җиткерү буенча районыбызда байтак эш башкарыла. Һәр мәдәният йорты, клуб каршында фольклор коллективлар эшләп килә. Алар районда, республикада үткән барлык чараларда актив катнашып, милли йолаларны тергезүгә һәм саклауга зур өлеш кертә.

Бу уңайдан мәктәпләрдә дә зур эш башкарыла. Мәсәлән, Иске Шәрәй төп гомум белем бирү мәктәбендә Мәүлидә Турьян кызы Таҗетдинова җитәкче­легендә “Хазина” фольклор төркеме эшләп килә. Биредә барлык чаралар аларның катнашлыгында үтә. Өстәвенә, түгәрәк әгъзалары район һәм республика күләмендә узган чаралардан да читтә калмый. Мәктәп мөдире Ләйсән Әбүзәр кызы Моталлапова билгеләвенчә, ел саен “Башкортстан энҗеләре”, “Яңгыравыклы үкчә” бәйгеләрендә катнашып, яхшы нәтиҗәләргә ирешәләр. Агымдагы елда “Хазина” фольклор төркеме әгъзалары “Башкортстан энҗеләре” конкурсында өченче урын яуладылар, ә фәнни-тикшеренү эше өчен Мактау грамотасына лаек булдылар.
Шул көннәрдә онытыла барган йолаларны кире кайтару һәм балаларны алар белән таныштыру максатыннан биредә “Нәүрүз” бәйрәме үтте. Ул бу көннең тарихын искә төшерү белән башланып китте. “Нәүрүз” сүзе фарсыча “яңа көн” дигәнне аңлата. Ул бик борынгыдан килгән Яңа елны каршылау бәйрәме. Нәүрүз көн белән төн тигез­ләшкән чорга – 21-22 мартка туры килә. Балалар бәйрәмнең үзенчәлекләренә дә тукталып үттеләр. Мәсәлән, өлкәннәргә ярдәм итү, өйләрен җыештыру, кар көрәү бик савап­лы эшләрдән санала. Алар үзләре дә нәнәй-картәтиләренә күчтә­нәчләр белән кунакка барулары турында әйтеп үттеләр.
Бәйрәм җырлар, биюләр, матур ши­гырьләр һәм милли уеннар белән үрелеп барды. Нәүрүзбикәнең монда ки­лүе ямь өстәде. Аның артыннан Карсылу килде. Алар бик озак “тарткалаштылар”, бигрәк тә кышның китәсе килмәде. Ләкин Карсылу арыды, сусады һәм җиңелүен танып, китәргә булды.
Шулай да иң көтеп алганы, мөгаен, коймак белән чәй эчү булгандыр. Бу уңайдан аларның әниләренә, нәнәй­ләренә дә рәхмәт әйтәсе килә, һәрберсе коймак пеше­реп, бәйрәмне үткәрүгә үз өлеш­ләрен кертергә тырышканнар. Шул ук вакытта бу күренеш мәктәп белән ата-аналар арасында тыгыз элемтә булуы турында сөйли.
Һәр бәйрәмнең үз тәртибе, гореф-гадәтләре, кыйммәте бар. Татар халкының милли йолаларын кечкенәдән үк балаларга аңлатсак, шундый борынгы бәйрәм­нәр үткәрелеп торса, буыннар арасында дәвам­лылык, миллилек хисе югалмас. Алар, һичшиксез, үз телләрен, рухи байлыкларын саклаучылар булып үсәчәк.
Эльвира Хөснетдинова.
Автор фотолары.
Читайте нас: