Безнең өчен үрнәк сез

Илтуган авыл клубында модельле авыл китапханәсе һәм урындагы мәктәпнең башлангыч сыйныф укучылары белән берлектә Совет гаскәрләрен Әфганстаннан чыгаруга 30 ел тулу уңаеннан “Әфганстан безнең йөрәкләрдә яши” дип исемләнгән кичә үткәрелде. Очрашуга хәрби хәрәкәтләр ветераны Килдеяров Рәфит Рәшит улы чакырылды.

Кичәнең максаты – укучыларны Әфган сугышы, аның асылы белән тирәнрәк таныштыру, хәрби хез­мәт­тә булган егетләргә карата хөрмәт хисләре тәрбияләү, батырлык, геро­изм кебек хисләрнең югарылыгын күрсәтү.

Җыелучыларны авыл биләмә­се­нең ветераннар советы рәисе сәлам­ләде. Соңыннан сүз кичәнең кунагы – Рәфит Рәшит улына бирелде.

- Хәрби өйрәнүләр үткәннән соң, хезмәткә Әфганстан җиренә җибәр­деләр. Сугыш, сугыш инде, югалтулары да күп булды: хәрби опера­ция­ләр барышында байтак иптәшләрем Әфган җирендә башларын салды, күпме яшь гомерләр челпәрәмә килде. Мәсәлән, Актүбә авылыннан Бакиев Риф Рафаэль улының гәүдәсе туган туфрагына салынды. Моны күңел аша үткәрүе бик авыр, яралары әле дә онытылмый. Ничек кенә булмасын, Туган ил боерды, ә совет солдатлары бары тик үзләренең интернациональ бурычларын үтәде. Минемчә, һәр ир-егет ил алдындагы изге бурычын мотлак үтәргә тиеш, - диде ул.

Клуб хезмәткәре Альфира Әхтә­мова хәрби хәрәкәтләрдә катнашкан егетләргә багышлап җыр башкарды.

Очрашу чәй табыны артында дә­вам итте. Ихлас аралашу минутлары белән кадерле дә, истәлекле дә чара җыелучыларның күңелендә озак сакланыр, дип ышанасы килә

Фәнүзә Йосыпова.

Илтуган авылы.