Балаларга шатлык бүләк иттеләр

Балаларга бигрәк тә осталык дәрес­ләре ошады. Кемдер үз куллары белән күз тиюдән саклый торган бетү ясарга өйрәнсә, кемдер котлау открыткасы, фетрдан уенчыклар эшләде, малайлар исә күбрәк конструктор янына җыелды. Ә инде перәникләр буяп һәм “Шоколад фонтаны”нда тәмлекәчләр ясап карау балаларга ошамый калмагандыр.
Балалар һәм үсмерләр спорт мәк­тәбе тренерлары оештырган турнирда исә балалар ике командага бүленеп, җитезлекләрен күрсәтте. Алар төрле конкурсларда көч сынашып, бүләк­ләргә дә ия булды.
Г.Х.Андерсонның әсәре буенча куел­ган чагу тамаша балаларны мавыктыргыч дөньяга алып керде. Су асты дөньясы турындагы әкиятне малайлар һәм кызлар йотлыгып карады.

Дөнья күләмендә билгеле иллюзионист Макс-Брайт­ның чыгышы чараны тагын да кү­­­ңел­лерәк итте. Кайдандыр серле рәвештә пәйдә бул­ган күгәр­ченнәр, тутыйкош, тәннән коелган тәңкәләр – болар барысы да балаларның хәтерендә озак сакланачак.
Бәйрәм чарасының тагын бер өлеше – бал. Кызлар һәм малайлар парлашып вальс биеде. Ә соңыннан чәй табыны артында җыелышты.
12 яшьлек Лилия Бай­гуска­ровага да бәйрәм бик оша­ды. Ул үзе дә рәсем тө­ше­рергә, аппликация ясарга һәм, әлбәттә, матур итеп ки­енергә ярата. Шуңа балга чакыру алгач, шатлыгының чиге булмый.
- Кызымның шикәр диабеты һәм Даун сндромы. Биш яшенә кадәр атламады һәм башын да күтәрә алмады. Соңыннан җай­лап аякларына басты һәм атлап китте. Хәзер ул безнең ярдәм­чебез, - ди әнисе Зәлия Сәй­фетдин кызы.
Балаларның бәхетле елма­юы күңелне һәрвакыт җы­лы хисләр белән баета. Бигрәк тә мөмкин­лекләре чикле булган малай-кыз­ларның һәрчак бә­хетле бу­луын күрәсе килә. Тор­мыш чәчкәләре булган ба­­лалар моңа һичшиксез лаек.
Эльнара Шәймәрдәнова.
Әлфия Әхмәдуллина.