Министр белән очрашу

Аграр ведомство җитәкчесе агросәнәгать комплексының заманча торышы белән таныштырды. Илшат Илдус улы игътибарны азык-төлек өлкәсендә килеп туган хәлгә - азык-төлеккә хакларның нигезсез артуына юнәлтте. Нәтиҗәдә, төп табышны җитештерүчеләр түгел, ә аны сатучы челтәрләр ала. Үз чиратында, халыкка азык-төлекне югары хакка алырга туры килә. Министр билгеләвенчә, бу проб­леманы хәл итү юлларын әле үк эзләргә, хәлне үзгәртергә һәм гомум көч белән яңа агро­сәнәгать сәясәтен төзергә кирәк. Биредә яшь депутатлар ярдәм итә ала.

Үз чира­тында, депутатларны авыл хуҗалыгы продукциясен күмәртәләп сату хакларының кимүе борчыды, кайбер күрсәт­кечләр буенча агымдагы елда хаклар шактый кимеде. Депутатларны авылда кооперацияне үстерү мәсьәләсе, барыннан элек, кешеләрне кооперативлар төзү технология­ләренә өйрәтү кирәклеге кызыксын­дыр­ды. “Арте­ми­да” токымчылык хуҗа­лыгы җитәкчесе Денис Заикин министрлык җи­тәкчесенә республика биләмә­сендә яшь белгечләрне һөнәри һәм сыйфатлы өйрәтү өчен урын булдыру турында тәкъдимен белдерде һәм уңай җавап алды. Очра­шу барышында депутатлар Яшь фермер мәктәбендә проект ысулын куллану тәкъдимен керттеләр.

- Фермерлар мәктәбенә килгәндә һәр кеше комиссияне үзенең идеясе яки проекты белән таныштырырга тиеш. Шулай итеп, без башлангыч этапта ук киләчәккә планнары булган яшьләрне генә сайлап алачакбыз. Өйрәтү барышында барлык катнашучылар үзләренең идеяләрен стартап дәрәҗәсенә кадәр җит­керергә тиеш. Чыкканда безнең Министрлык һәм Берлектә хуп­ланачак берничә сыйфатлы проект булырга тиеш, - дип мөрә­җәгать итте БР Яшь депутатлар берлеге рәисе Владимир Яковлев.

Карау­чы­сыз йөрегән маллар проблемасына да тукталып үтел­де. Салынган штрафлар ул маллар китергән зыянны каплата алмый. Шул ук вакытта малларына тамга салудан баш тартучыларга карата җаваплылык каралмау сәбәпле, гаепле ке­шеләрне белеп булмый. Баймак районы депутатлары малларын караучысыз чыгарып җибәргән, юл-транспорт вакыйгасы китереп чыгарган һәм чәчүлекләргә зыян китергән мал хуҗаларына җәзаны катгыйлату тәкъдиме белән чыгыш ясады. Министр моны хуплады һәм закон проекты әзерләргә кушты. Бил­ге­ләвенчә, узган елда республикада крестьян-фермер хуҗалыклары һәм авыл хуҗалыгы пред­приятие­ләренең саны артуы, ә шәхси ярдәмчел хуҗалыкларның саны кимүе күзәтелә. Агымдагы елда урыннарда кооперацияләр төзүгә аеруча игътибар бире­ләчәк. БР Авыл хуҗалыгы министрлыгы чыгымнарның 50 процентына субсидия бүләргә әзер булуы турында белдерде.

- Без авыл хуҗалыгын коммерциализация өлкәсенә күче­релергә тиеш, - дип очрашуга йомгак ясады Илшат Фазрахманов.

Рәсил ИСЛАМОВ,

Яшь депутатлар берлегенең Координация советы әгъзасы.