Язгы басу эшләре алдыннан

Конференцияне район баш­лыгы Альфир Сабиров ачып җибәрде һәм узган елда гади булмаган шартларда эшләргә туры килсә дә, авыл хуҗалыгы эшчәннәре өчен ул уңышлы булды, дип бил­геләде.
- 2000 елда авыл хуҗа­лыгының тулаем продукция күләме 4,8 миллиард сум тәшкил итте. Заманча яңа технологияләр куллану һәм уңайлы һава шартлары 145 мең тоннадан артык ашлык җыеп алырга булышлык итте. Бөртекле культураларның уртача уңышы һәр гектардан 30 центнердан артык. Ел нәти­җәләре буенча, безнең район авыл хуҗалыгы продукциясе җитештерү буенча югары күрсәткечләргә иреш­кәне өчен БР Хөкүмәтенең дипломы белән бүләкләнде, - дип мәгълүматлар китерде Альфир Фәрхәт улы.
Районның Авыл хуҗа­лы­гы идарәлеге начальнигы Ил­дар Латыйпов алдагы миз­­ге­лгә планнары белән уртаклашты. Агымдагы елда 44358 гектар мәйданда – са­бан культуралары, 6809 гектарда – көнбагыш, 441 гактар мәйданда - шикәр чөгендере чәчү күзаллана.
- Авыл хуҗалыгы пред­приятиеләре һәм фермер хуҗа­лыклары тулысынча 6 мең тоннадан артык күләмдә орлык материаллары белән тәэмин ителгән. Әлеге вакытта сатып алынган элиталы орлыклар 200 тонна тәшкил итә. Аларның барсы да тикшерү үткән һәм кондицияле. Иртә өлгерүче сабан һәм бөртекле-кузаклы культуралар чәчүне15 көн эчендә тәмамлау планлаштырыла, - диде Илдар Рәүф улы.
Гостехнадзорның Кырмыскалы районы буенча баш дәүләт инженер-инспекторы Илнар Галиев агросәнәгать комплексы предприятие­ләрендә техник күзәтү барышы турында сөйләде. 7 апрельгә техниканың 60 проценттан артыгы техник кү­зәтү үткән.
Язгы басу эшләрен үткә­рүгә агротехник таләпләр һәм авыл хуҗалыгы культуралары уңышына йогынты ясау­чы факторлар турында Башкорт аграр университеты доценты, авыл хуҗалыгы фән­нәре кандидаты Алексей Дмитриев сөйләде.
Шулай ук Римма Вахи­то­ваның авыл хуҗалыгы культураларын корткычлардан һәм авырулардан саклау, Чулпан Юнысованың чәчү эш­ләре үткәрү барышында хә­веф­сезлек техникасының төп таләпләре, Илдус Хәми­товның янгын хәвефсезлеге чаралары турындагы докладларын тыңладылар.
– Агроконференция мавыктыргыч һәм файдалы үт­те. Миңа, инженер буларак, Гостехнадзор вәкилләренең чыгышын тыңлау, янгын хә­вефсезлеге кагыйдәләре турында яңалыкларны ишетү кызыклы булды. Спикерлар агымдагы язда басу эшлә­ренең вакыты буенча фаразлар бирделәр һәм безне эшкә дәртләндерделәр. Хуҗалыкта барлык техника язгы басу эшләренә әзер, ике сменада эшләү өчен механизаторлар белән тәэмин ителгән. Кыскасы, без чәчүгә төшәргә әзер, - диде “ШӘЙМОРАТ” фермер хуҗалыгының баш инженеры Илгиз Фәйзуллин.
Әлфия ӘХМӘДУЛЛИНА.