Үзән
+11 °С
Болытлы
Барлык яңалыклар
Дата
23 гыйнвар 2018, 11:23

Үзе чибәр, үзе тырыш, күзләр генә тимәсен!

25 гыйнвар – йола буенча, Татьяна, ягъни, Студентлар көне буларак билгеләнелә. Нинди милләт һәм диндә булуларына карамастан, барлык яшьләр дә аны түземсезләнеп көтеп тора.

Барлык уку йортларына да тирән белемле, үз эшләрен ныклы белгән актив укучылар кирәк. 2нче санлы Кырмыскалы урта мәктәбен тәмамлап, әлеге вакытта М.Акмулла исемендәге Башкорт дәүләт педагогия уни­верситетының 4нче курсында белем алучы Ләйсән Сафина шундыйлар­ның берсе. 1нче курстан ук ул төркемнең старостасы һәм тьютор төркеме җитәкчесе булып тора. Ә кем соң ул тьютор? Бу сүз инглизчә дус, ки­ңәшче, конфликтлы хәл­ләрне чишәргә ярдәм итүче, психолог, белем алу барышында төп ярдәмче һәм тиешле карарлар кабул итү юлын күрсәтүче дигән сүз.
Икенче курстан ук Ләйсән “Яшь­ләр сәясәте лигасы” оешмасы әгъзасы булып тора. Биредә яшь егет­ләр һәм кызлар үзләренең проектларын тормышка ашыра, лидерлык сыйфатларын һәм ораторлык осталыкларын үстерә ала. 2017 елның фев­ралендә оешма проектларын тормышка ашыруда актив катнашканы өчен Ләйсән Сафина БР “Яшьләр сәясәте лигасы” яшьләр оешмасының күк­рәккә тага торган билгесенә лаек була һәм М.Акмулла исемендәге Башкорт дәүләт педагогия уни­вер­ситетының урындагы бүлекчә рәисе итеп сайлана. Шулай ук “Русия­нең студентлар отряды” оешмасы әгъзасы буларак, җәйге чорда студентларны эшкә урнаштыруда ярдәм күрсәтә. Бу оешмада вожатый, проводник һәм төзүче кебек төрле юнәлешләр бар. Җәй көне “Русиянең студентлар отряды” җылы якларга барып отельләрдә, балалар лагерь­ларендә, рестораннарда эшлиләр һәм башка төбәк­ләрдән килгән студентлар белән танышалар. Ә ял көн­нәрендә сәяхәт ясыйлар.
- Узган җәй Кырымда “Ялта” Бөтенрусия объектында булып, бик күп тәэссоратлар алып кайттым, әле булса ул мизгелләр кү­ңелгә җылылык өсти, - ди Ләйсән.
Шулай ук кыз фән белән кызыксына. М.Акмулла исе­мендәге Башкорт дәүләт педагогия университеты сту­дент­ларының фәнни-тик­шеренү эшләре һәм инновацион проектлары конкурсында катнаша. Бер төркем­дә укучы Александра Лукьянова һәм җитәкчесе Луиза Вәли кызы Фәрхет­динова белән начар ишетүче­ләрне тикшерү һәм сурдопедагогика буенча сөйләм таблицалары уйлап тапканнар. Аларның бу эше конкурста өченче урын яулаган.
Әтисе Марат Муллаәхмәт улы һәм әнисе Равилә Фәр­хетдин кызы да Ләйсәннең һәр башлангычларында ярдәм итә.
- Мине аңлаганнары һәм даими ярдәм күрсәткәннәре өчен әти-әнием һәм энем Айратка рәхмәтлемен. Мин аларны бик яратам, - ди кыз.
Бүген студентлар тормышы элеккегә караганда күпкә кызыклырак һәм күпкырлы. Алар җәмәгать эшләрендә катнашып, үзләренең мөм­кин­лекләрен үстерә ала. 25 гыйнварда югары уку йортлары һәм техникум студентлары өчен бик күп чаралар үткәреләчәк. Укудагы уңыш­лары һәм студентлар тормышында актив катнашучыларга дипломнар тапшырылачак һәм стипендия биреләчәк.
Милена Шәймәрдәнова.
Читайте нас: