Яралар әле дә онытылмый...

Сергей Петрович тумышы белән Михайловка авылыннан. 1981 елда Совет Армиясе сафларына алына һәм Әфганстанның Кундуз шәһә­рендә урнашкан 149нчы полкка эләгә. Яхшы хезмәте өчен аны взвод командиры урынбасары итеп тәгаенләп куялар.

- Хезмәт иткән чорда без күргәннәр: снаряд-бомбалар шартлавы, кан исе, исәпсез-хисапсыз кеше мәетләре - болар барысы да бүгенгедәй күз алдымда. Әлеге күренеш күңелләрне кузгата, йө­рәк­ләргә үтеп керә. Хезмәттәш­ләрем белән заданиеләргә барганда коры ризык түгел, ә сугыш кирәк-яраклары белән коралланабыз. Дошманнар качып яткан мәгә­рәләрне басып алганда, анда сугыш кораллары яше­ренгән складларга тап була идек. Кайбер авылларда буйволлар җигеп җир сөрәләр. Бу безнең өчен бигрәк читен тоелды.

Республикада яшәгән, шулай ук Белоруссиядәге хез­мәттәшләребез белән аралашып торабыз, бер-беребезне бәйрәмнәр белән котлыйбыз. Ел саен Җиңү паркында очрашып, хезмәт чорын, туган якларына кайтырга насыйп булмаган иптәшләребезне искә алабыз, – ди әңгәмә­дәшчем.

Шуны да әйтеп үтәргә кирәк, яхшы техника һәм корал белән тәүлек буена ике тау арасында мең ярымнан артык дошманны тоткарлап торган һәм күрсәткән батырлыгы өчен Сергей Кузьмин медаль белән бүләкләнә. Ә туган ягына әйләнеп кайткач, водительгә укып чыга һәм биш ел УПАГАТ-1 оешмасында эшли. 1989 елда өйләнә һәм бүгенге көнгә кадәр Кырмыскалы линия-производство идарәлегендә эшләп йөри. Тормыш иптәше Вера Петровна белән Аня һәм Нина исемле кызлар үстергәннәр.

- Ватанны саклау - ир-егетнең изге бурычы. Әмма Җир йөзендә сугышлар башка кабатланмасын. Яшь егетләр­нең гомере вакытсыз өзел­мәсен, ата-аналар кайгы яше түкмәсен иде, - ди әңгәмә­дәшчем, авыр хатирәләргә бирелеп.

Марсель Рәшитов.

Автор фотосы.