“Улларым көчле рухлы ”

2016 елда гәзит бит­ләрендә без Ефремкино авыл Советының Никифоровка авылы кешесе – Бөек Ватан сугышы елларында хәрби бурычын үтәгәндә экипаж белән бергә һәлак булган Щ-304 су асты көймәсе командиры Я.П.Афа­насьев турында сөй­ләгән идек инде. Бак­саң, ул су асты корабле ко­мандиры булган бер­дәнбер якташыбыз түгел. Әйткән­дәй, Наил Сәйфелгалим улының сүзләре буенча, Ру­сия­нең су асты флоты тарихында Башкортстаннан чыккан су асты флоты ко­мандирлары бармак бе­лән генә санарлык. Алар арасында якташыбыз - Прибельский авылыннан А.Н.Феоктистов та бар.

Әлбәттә, Александр Ни­ко­лаевичның үзен кү­реп сөйләшәсе килгән иде. Ләкин флот ветераны, отставкадагы беренче ранг капитаны туган авылыннан еракта – Курск өлкә­сендә яши. Шуңа күрә авыл читендәге зур булмаган йортта яшәгән әтисе белән сөйләшергә туры килде.

- Саша - тормыш иптә­шем Валентина Ивановна белән дөньяга китергән балалары­бызның иң өл­кәне. Ул Архангель райо­ны­­ның Инҗәр елгасы буенча урнашкан Яковлевка авылында үсте. Бәлки, шуңа да аңа моряк булырга насыйп иткәндер, - ди Николай Алексеевич.

Ныклы рухлы һәм максатка омтылган гади авыл малае Казан Суворов училищесын «отлично»га тә­мамлый, соңыннан Бакин югары хәрби-диңгез училищесында белем ала.

Александр Феоктис­товның хезмәте Төньяк флотта үтә. Би­редә ул 15 ел дәвамында дизельле су асты көймәсе командиры була, соңыннан шул ук флотның Генераль штабына җитәкчелек итә. Отставкадагы тәҗрибәле офицер Курс өлкәсендәге Гадәттән тыш хәлләр идарәлеге җи­тәкчесе булып эшли.

Александр Никола­е­вич­­ның ике улының да язмышы хөр­мәткә лаек. Өл­кәне Алексей әти­се юлыннан китеп, Ленинград югары хәрби-диңгез училищесын тәмамлый. Картәти­сенең сүзләре буенча, бү­генге көндә ул полковник званиесендә Се­вастополь­дәге Кара диңгез флотында спецназчылар әзерләү буенча бүлекчәдә хезмәт итә.

Кечесе Евгений шулай ук хәрби хезмәткәр – ул Русия Федерациясе Президенты Федераль сак хезмәте подполковнигы.

- Минем улларым көчле һәм көр күңел­ле , - ди Николай Алек­сеевич, зур горурлык хисе белән, гаилә архивындагы фо­торәсем­нәрне актарып.

Тәлгать Мөхәммәтҗанов.