“Һәрвакыт комсомол булып калдым”

Флюр Әхмәт улы 14 яшендә комсомолга керә. Егет Иске Шәрәй җидееллык мәктәбендә яхшы укый, физик яктан көчле, үзешчән сәнгатьтә дә катнаша. Мәктәпне тәмамлау белән Ф.Ә. Уразгилдин Йоматау авыл хуҗалыгы техникумына, соңын­нан Куйбышев план-икътисадый институтына укырга керә.

– Минем комсомол эшчән­леге – озын тарих. 1960-1963 елларда Алма-Ата шәһәрендә чик буе гаскәрләрендә хезмәт иткән чорда яшьләр берлеге активисты, частьның комсорг урынбасары итеп сайладылар, - ди ул. - Хезмәт итү чорында мин беренче класслы радиотелеграфист-эстист, хәрби һәм сәяси әзерлек отличнигы да булдым. “Совет Ар­миясе отличнигы” һәм “Ал­дын­гы чик сак­чысы” билгеләре белән бүләк­­ләндем. Мәскәү шәһә­рендә ВЛКСМ Үзәк комитеты һәм Чик буе гаскәрләренең баш идарәлеге белән берлектә чик буе гаскәрләре отличниклары киңәшмәсендә катнаштым. Соңыннан Төркестан хәрби ок­ругы утырышчысы итеп тә­гаен­ләделәр. Алма-Атада КПСС сафларына кабул ителдем. Хәр­би, сә­яси һәм махсус әзерлек өчен ВЛКСМ Үзәк комитетының Мак­тау грамотасы белән бүләк­ләделәр.

Комсомол оешмасында алган тәҗрибәмнең армия хезмәтен­нән соң да файдасы тиде.

Демобилизациядән соң әңгә­мәдәшчебезне партия район комитеты инструкторы итеп тә­гаенлиләр һәм чираттагы комсо­мол конференциясендә ВЛК­СМ район комитеты бюросы әгъза­сы, ә 1966 елда комсомол район комитетының беренче секретаре итеп сайлыйлар.

– Ул вакытта яшьләр оешма­ларының эшенә зур игътибар бирелә иде. Колхоз һәм совхозлардагы башлангыч комсомол оешмасы секретарьлары итеп яшь коммунистлар сайланды. Без секретарьларның комсомол эшчәнлеге белән шөгыльләнү­ләрен һәм хезмәт хакы түләнүенә ирештек. Касыйм Әх­тәмов, Марат Заһидуллин, Мөх­тәр Абакачев, Нәсим Йөзлек­баев, Александр Петров, Шамил Бикмәтов кебек активистлар үз­лә­рен оста башлыклар итеп кү­рсәттеләр. Шулай ук ВЛКСМ ра­йон комитеты хокук саклау ор­­ганнарында комсомол оешма­лары төзелде һәм аның вәкил­ләре ВЛКСМ район комитеты һәм бюро әгъзалары итеп сайланды.

Урта һәм сигезьеллык мәк­тәпләрдәге яшьләр оешмаларына игътибар зур булды. Район комитеты эшендә тәрбияви эш буенча урынбасарларга һәм өлкән пионервожатыйларга таяна алды. Мәктәп директорларына да ярдәм күрсәтелде.

Тәрбияви, спорт эше, үзеш­чән сәнгать һәм сыйныфтан тыш чаралар үткәрү мәсьәләләре буенча ВЛКСМ район комитеты һәм районның мәгариф бүлеге советы берлектә карарлар кабул итте. Мәктәпләрдә сызма культуралар үстерү буенча производства бригадалары төзелде, ә җәй көне шикәр чөгендере эшкәртүгә укучылар җәлеп ителде.

Водительләр һәм тракторчылар әзерләү буенча курслар эш­ләде. Сахай урта мәктәбе каршында йорт куяннары үрчетү буенча бригадалар бар иде.

– Яшь комсомоллардан КПСС съезды делегаты Флюр Турьянов, Ленин комсомолы премиясе лауреаты Рифкать Миһранов кебек бер дигән механизаторлар үсеп чыкты. Колхоз һәм оешма җитәкчеләренең кү­бесе комсомол сафыннан чыктылар. Мәсәлән, Рәшит Жданов колхоз рәисе булды, ә Мидхәт Рәҗәпов район гәзите редак­циясенә җитәкчелек итте, – ди әңгәмәдәшчебез.

Ул елларда мәктәпне тәмам­лаучыларны ВЛКСМ район комитеты аша Авыл хуҗалыгы институтларына һәм Эчке эшләр министрлыгы мәктәпләренә укырга җибәрәләр иде. Лидерлык сыйфатлары булган һәм укуда һәм җәмәгать тормышында уңыш яулаучылар югары уку йортларына өстенлекле шартларда кабул ителде.

– ВЛКСМ район комитеты­ның беренче секретаре булып берничә ел эшләгәннән соң, КПСС район комитетының беренче секретаре Николай Яковлевич Батановка: “Комсомолда озак тоткарландым ахры”, дидем. Ул: “Дзержинский олыгайганчы яшьләр оешмасына җитәкчелек иткән” дип үтенечемә каршы килде.

Еллар үтте һәм мин күңелем белән һәрвакыт комсомол булып калдым. Ленин комсомолы сафларында булуыбыз белән чиксез горурланабыз. Комсомол сафларында тәрбияләнгән барлык кешеләрне дә ВЛКСМның 100 еллыгы уңаеннан чын күңелдән котлыйм, - ди Флюр Әхмәт улы.

Әлфия Йомакаева язып алды.