Армый-талмый закон сагында

Район прокуроры урынбасары Алексей Николаевич Петров­ка яраткан һөнәренә ия булу өчен тырышлыкны эшкә җи­гәр­гә, бихисап киртәләрне үтәргә туры килә. Шуңа да һөнәре аңа аеруча кадерле.

- Прокурор булам, дигән ныклы карарга 9нчы сыйныфта укыган чакта килдем, – дип хәтерли Федоровка районында туып-үскән Алексей Николаевич.

Әтисе колхозда шофер булып эшләсә, әнисе мәктәптә җыеш­тыручы була. Малай әти-әнисенә хуҗалык эшләрендә ярдәм итеп, мал-туар карашып үсә, хәтта сыер да саварга да өйрәнә. Әмма авыл кешесенә җиңел булмавын, өстәвенә, акча җитмәвен белеп-күреп үскән үсмер егет авылда калу теләге белән янмый. Белем алырга, кул белән түгел, ә акыл эшчәнлеге белән икмәк табарга өйрәнергә омтыла һәм Урал дәү­ләт юридик академиясенә укырга керә.

- Авылдан килгән гади малайга тәүдәрәк авырга туры килде, әмма тиз генә өйрәнеп киттем. Төр­кемдәге егет һәм кыз­ларның тату булуы, бер-бере­безгә терәк булуыбыз ярдәм итте. Студент еллары акчаның кадерен белергә өйрәтте. Укуы авыр булса да, буш вакытта автостоянкада сакчы булып та эшләргә туры килде. Барлык тырышлыкларын мине укытуга багышлаган әти-әниемә рәхмәт­лемен, - ди Алексей Петров.

Биш ел сизелми үтеп тә китә. Кулына диплом ал­ган, эшкә сусаган яшь белгеч республика проку­ратурасының кадрлар бүлегенә килә, әмма монда аны колач җәеп каршы алучы булмый. Баксаң, тәүдә күпмедер вакыт тирәсе стажировка үтәргә, ягъни бушлай эшләргә кирәк икән. Студент елларында акчасызлык үзә­генә үткән егет моңа риза булмый. Ул Стәрлетамак шәһәренә Федераль җәза­ларны үтәү хезмәтенә офицер да түгел, рядовой булып эшкә урнаша.

- Шул вакытта идарә­леккә килгән прокурорларны күреп, аларга сокланып карап торганым исемдә калган, - ди ул.

Бераздан Алексей Николаевичны Тикшерү комитетының Авыргазы районындагы бүлегенә тикшерүче итеп тә­гаенлиләр. Белгеч монда да сынатмый. Җитмәсә, Федераль җәзаларны үтәү хезмәтендә алынган тәҗ­рибә, университетта алынган белем дә ярдәм итә. Эш күп булганлыктан, кабинетта кунып калган вакытлары да аз булмый. Шулай да тырышлык үзенекен итә - үзен яхшы яктан гына күрсәткән белгечне башкаланың Октябрь районына прокурор ярдәмчесе итеп эшкә чакыралар. Ә 2014 елдан инде ул безнең районда әлеге вазыйфаны башкара.

- Эшчәнлегемнең төп юнә­лешләренең берсе – граждан­нар­ның хокукларын яклау, кор­рупциягә каршы көрәшү, халык­ның мөрәҗәгатьләре буенча эшләү. Ялулар күбесенчә хезмәт мөнәсәбәтләренә, эш хакын вакытында түләмәүгә бәйле. Коррупцион җинаятьләр дә булып тора. Гомумән, Кырмыскалы районында халык тыгыз урнашканлыктан, бурычлар да җитәр­лек. Эшебез җиңел түгел, әммә һөнәремне нык яратам, шуңа аның авырлыгы сизелми.

Мөмкинлектән файдаланып, хезмәттәш­лә­ремне һәм прокуратура ветераннарын һөнәри бәйрәм белән чын кү­ңелдән котлыйм, ныклы сәламәтлек һәм эшлә­рендә уңышлар телим, - ди үз эшенең барлык нечкә­лекләренә төшенеп, армый-талмый законга фидакарь хезмәт итүче Алексей Николаевич.

Прокуратура эшчән­леген, бихисап бурычларны гомуми­ләштергәндә, кыскача гына “кешеләргә хәвефсез тормыш булдыру” дип тә әйтергә мөм­кин. Әмма шул сүзләр артында – үз һөнәренә мө­киббән киткән Алексей Петров кебек хезмәт­кәр­ләрнең тырыш хезмәте ята.

Эльнара Абакачева.

Фирүзә Рәхмәтуллина фотосы.

Хөрмәтле прокуратура хезмәткәрләре һәм ветераннары!

А.Сабиров, муниципаль район хакимияте башлыгы.