Биш улының сөекле әнисе ул

Диларә Сафина уңган хуҗабикә, һәрвакыт хәрәкәттә, барысына да өлгерергә тырыша. Биш уллары турында хәстәрлек күрергә дә кирәк. Улларының һәрберсе үз эшен белә һәм гаилә иминлегенә үз өлешен кертә. Әти-әнисе аларның гаилә өчен чын терәк һәм өмет булып үскәннәрен зур горурлык белән күзәтәләр.

Яңарак Диларә Альбирт кызы “Ана даны” медале белән бүләкләнде.

- Әни булу – зур бәхет ул. Биш бала әнисе буларак, мин бар нәрсәдән тик яхшылык кына күрергә өйрәндем. Барысын да тиешле итеп кабул итәм, башкача булуы мөмкин дә түгел. Ниндидер авырлык килеп чыга икән, бергәләп киңәшләшеп хәл итү юлын татабыз. Гаиләдәге ышаныч шуңа нигезләнә дә.

Ә балаларыбыз – безнең өчен чиксез бәхет чыганагы. Аларны без бик яратабыз. Иң мөһиме, барсын да дөрес дөрес оештыра белү, беркайчан да төшенкелеккә бирелмәскә һәм йомшармаска гына кирәк. Тормыш иптәшем һәм балаларымның миңа булган ихтирамы, сөюе нык ярдәм итә. Нәкъ шушы мәхәббәттән без көч алабыз, - диде әңгәмәдәшчебез.

Сафиннар гаиләсе, чыннан да, тату, хезмәт сөючән һәм максатчан гаиләләрнең берсе, ә күпбалалы гаиләдәге бурычларны үтәү җиңел түгел. Диләрә Альбирт кызы бераз вакыт Уфа шәһәренең 5нче дәваханәсендә буфетта эшләгән, яңарык үзләре янындагы кибеткә эшкә урнашкан. Ул хатын-кызның һичшиксез үз шөгыле булырга тиеш, бу аңа үзен үстерергә ярдәм итәчәк дип исәпли.

Тормыш иптәше Илнур Альмир улы белән 18 ел бер-берсенә терәк һәм кирәк булып гомер итәләр. Бу вакыт эчендә алар бик күп шатлыклы мизгелләр кичерделәр, авыр вакытларда бер-берсенә ярдәм иттеләр һәм мәхәббәт һәм ышаныч белән тулы ныклы гаилә кордылар. Аларның уртак юлы - үзара аңлашу, хөрмәт һәм максатларына бергә бару. Бергә үткәрелгән һәр ел аларның арасын тагы да ныгыта һәм тормышларын яңа куанычлы вакыйгалар белән баета.

Авылдашлары да бу гаиләне эшчән, өлгер, намуслы булганнары өчен хөрмәт итә. Тынгысыз Сафиннар мал асрый, кош-корт үрчетә, бакча тутырып яшелчә-җимеш үстерә. Димәк, аларның өстәлендә һәрвакыт табигый ризык. Уртак тырышлыклары Сафиннарны хезмәт сөючән һәм бердәм итә.

Балалары – аларның чын горурлыгы. Өлкән улы Дамил Уфа радиоэлектроника, телекоммуникацияләр һәм хәвефсезлек колледжының беренче курсында белем ала. Улы Данил тугызынчы сыйныфта укый. Менә җиденче ел инде әти-әнисе аны атнага өч тапкыр Кырмыскалы район мәдәният сараена үрнәкле “Йолдыз” бию ансамбленә йөретә. 

Кече уллары да абыйларыннан калышмый. Илсур мәктәптә – дүртенче, Инсаф – икенче сыйныфта укыйлар. Иң кечеләре дүрт яшьлек Данияр балалар бакчасына йөри. Аларның һәрберсе үзләренең кечкенә уңышлары белән әти-әнисенә шатлык бүләк итә.  

Сафиннарны тормыш көтәр өчен генә яратылган диярсең.

- Алдагы көннәрдә дә матур яшәп, тигезлектә балаларны аякка бастырырга насыйп булса иде. Бәхетне һәркем үзенчә таба. Авылда, туган җиреңдә тапканы кадерле дә, газиз дә ул”, - дигән изге теләктәләр Диларә белән Илнур.

Матур гаилә кору - зур эш. Ләкин яхшы, тату гаилә кору өчен бер-береңнең теләк-ниятләрен, уй-хисләрен аңлап яши белү дә кирәк. Шул чакта гына дөньяң көйле барачак. Сафиннар гаиләсе моны яхшы аңлый һәм бәхетләрен күз карасыдай сакларга тырыша.

Марина ВИКТОРОВА.

8 Март - Халыкара хатын-кызлар көне

Хөрмәтле хатын-кызлар!

Сезне чын күңелдән язның матур бәйрәме - Халыкара хатын-кызлар көне - 8 Март белән котлыйм.

Сез теләсә нинди авырлыкларны җиңәсез, тормышыбызны шатлык һәм җылылык белән тулыландырасыз, уңайлыклар тудырасыз һәм өй учагын саклыйсыз, ир-егетләрне яңа казанышларга һәм уңышларга рухландырасыз. Эшегездә уңышлы хезмәткәр буларак, һөнәри югарылыкка ирешәсез, иҗтимагый тормышта актив катнашасыз, шул ук вакытта гаиләгезне, туганнарыгызны һәм якыннарыгызны да онытмыйсыз.

Сезнең зирәклегегез йорт учагын сакларга һәм хезмәт коллективларына җитәкчелек итәргә өйрәтә. Сезнең сабырлыгыгыз көндәлек тормыш авырлыкларын үткәреп җибәрергә, изге йөрәгегез балаларыгызны, оныкларыгызны тәрбияләргә ярдәм итә.  

Сезгә чын күңелдән иминлек, сәламәтлек, гаилә муллыгы һәм бәхет-шатлыклар телим. Яныңда һәрвакыт яратучан һәм кайгыртучан кешеләр булсын. Күзләрегездәге елмаюларыгыз сүнмәсен! Бәхетле һәм сөекле булыгыз!

Альфир Сабиров, муниципаль район хакимияте башлыгы.