"Хатынын да, үзен дә харап иткән..."

Чиләбе өлкәсендә өч көн элек өйләнешкән пар кичә коточкыч фаҗигагә тарыган. Бу хакта урындагы киңкүләм мәгълүмат чаралары хәбәр итә.

Алар дуслары белән ял иткәндә чананы машинага тагып урам буйлап йөрергә уйлаган. Әмма араларында машина руле артына утырырга айнык водитель булмаган. Шуңа да карамастан, алар бу гамәлне кылган.

Яңа өйләнгән ир-егет үзе рульгә утырган, ә хатыны белән дус кызы чанада булган. Кызганычка каршы, борылышларның берсендә чана баганага килеп бәрелгән. Ирнең хатыны җитди җәрәхәтләр белән дәваханәгә эләккән. Аңа бүген өченче операция эшләячәкләр.

Ә дус кызы авария урынында ук үлгән. Аның әти-әнисе сүзләренә караганда, бу фаҗигадә ир-егет гаепле. "Кызыбызны да, хатынын да үзе харап итте", дигән алар хокук сакчыларына.

Әлеге вакытта полиция хезмәткәрләре ирне тоткарлаган һәм бу хәл буенча җинаять эше ачканнар. Аңа 7 елга кадәр төрмә яный.

Фото: нд29.рф сайтыннан