Үзән
+29 °С
Ачык
Барлык яңалыклар
Фикер
6 апрель 2018, 12:30

Этләр дә ярата белә

Терлек дөньясында нинди генә гаҗәеп хәлләр булмый. Яшәгән саен нинди дә булса яңалык килеп чыгып тора. Эт елына багышлап, ел символы турында язып үтәсе килгән иде.

Бу вакыйгага күпме генә вакыт үтсә дә, һич онытылмый. Бөек Ватан сугышыннан соң Украина чигендә булган хәл турында миңа шунда хезмәт иткән дустым Вагыйзь Гарифуллин сөйләгән иде. Аның белән бергә Туймазы егете Шәрифулла (фамилиясен хәтерләмим) этләр белән илебезнең чиген саклаганнар. Бервакыт обход ясарга киткән иптәше вакытында кире кайтып җитми. Күп тә үтми аның эте йөгереп кайтып, солдатлар тирәсендә әйләнгәләп йөри башлый. Болар этнең үзе белән ияртеп алып китәргә те­ләвен аңлап, аңа ияреп ки­тәләр. Эт аларны Шәри­фул­ланың үле гәүдәсе яткан урынга алып килә. Күрәсең, ул дош­­ман засадасына эләгеп, һәлак булган. Икенче көнне аны барлык часть белән җир­лиләр. Елый-елый гәү­дәсен җиргә тапшырсак та, эш мо­ның белән генә тәмам­лан­мады. Эте ашамый, эчми, питом­никтан кай­дадыр чыгып китәргә омтыла. Бер­гәләшеп киңәшләш­кән­нән соң аны чыгарып җибә­рергә булалар. Ул шунда ук урманга юл тота һәм күп тә үтми күздән югала. Ике көннән соң гына частька кайтып керә, үзе канга батып беткән була. Ниш­ләргә белми, аны янә ябып куялар. Ләкин өч көн шыңшып яткач, яңадан чыгарырга һәм артыннан кү­зә­теп барырга уйлыйлар. Эт туп-туры Шәрифулла җир­лән­гән зиратка килә һәм күп тә үтми каберен чокый башлый. Ку­ып та, чакырып та карыйлар, килеп чыкмый. Шулай итеп, табутка кадәр чокып төшә һәм шу­ның өстенә бөгәрләнеп ятып үлә. Этне дә шул кабердә җир­лиләр.
Аның урманга китеп, канга батып кайтуын гына аңламый­лар. Хуҗасын аткан дошманнарны эләктереп, бугазларын чәйнәп, хуҗасы өчен үчен алган микән? Бу язмам белән этләрдә тугрылык, ярату хисе ни кадәр көчле булуы турында әйтәсем килгән иде.
Хәмзә Яхин.
Читайте нас: