Дуслык белән көчлебез

Кырмыскалы районы – күпмилләтле төбәк. Монда элек-электән 30дан артык милләт вәкилләре дус һәм тату яшәп килә. Иң мөһиме – бу бердәмлекне тәэмин итү юнәлешендә байтак эш башкарыла. Районда узган нинди генә чараны алма, аларның нигезендә милләтара дуслык, туганлык, татулык ята. Килгән кунакларны бездә яшәүче төрле милләт вәкилләренең милли киемнәрендә, милли ризыклар белән каршы алу, гореф-га­дәт­ләребезне күрсәтү кебек бик күркәм йолалар ныклы саклана.

2012 елда Кырмыскалыда “Башкортстан татарларының милли-мәдәни автономиясе” җәмәгать оешмасының район бүлекчәсе оештырылды. Милләт мәнфәгатен­дә һәм власть органнары, башка җәмәгать оешмалары белән тыгыз хезмәттәшлектә эшчәнлек алып баручы бу оешма районы­бызның иң актив кешеләрен – төр­ле яшьтәге, төрле һөнәр ияләрен берләштерә. Нигез салынганнан бирле аңа Зөлфия Әхмәрова җитәкчелек итә. Оешманың эшчәнлеген районда узган чаралар белән дә бәһаләргә мөмкин.
Мәсәлән, ике ел элек Кабак авылы мәдәният йорты каршында “Ак калфак” татар хатын-кызлар оешмасының район бүлекчәсе булдырылды, ул бүген дә бик уңышлы эшләп килә. Аңа иң актив әгъза­ларыбызның берсе – урындагы мәдәният йорты директоры Халисә Әхмәтшина җитәкчелек итә. “Әбиемнең серле сандыгы”, “Туй йоласы”, “Каз өмәсе” кебек бәйрәм­нәр биредә барлык шартларына туры китереп, югары дәрәҗәдә оештырылды. Телебезне, йолаларыбызны саклау мәсьәләсенә дә бик җитди карый Ха­лисә Носратулла кызы. Үзе җитәкчелек иткән мәдәният йортында калфак ясау буенча осталык дәресләре үткәрә, йолаларны сәхнәләштерү эшенә мәктәп укучыларын да җә­леп итәргә тырыша, шуның нәтиҗәсендә балаларга үз теллә­рен өйрәтүне дә максат итеп куя.

Шулай ук активист авыл китап­ханәчеләренең эше дә мактауга лаек. Илтуганнан – Гөл­чирә Кадаева, Бозаяздан Әлфинә Мостаева даими рәвештә татар шагыйрьләре һәм язучыларына багышланган әдәби кичәләр үткәрәләр, үсеп килүче буынны татар халкының гүзәл сыйфатлары, тормыш-көнкүреше, кул эшләре бе­лән таныштыру максатында кич утыру йолаларын тергезү өстендә эшлиләр. Активистларыбызның кул эшләрен төрле бәйрәм чаралары чикләрендә оештырылган күргәзмәләрдә дә күрергә мөмкин.

Сабантуй, “Чыңла, чалгы!”, “Уй­на, гармун!” кебек бәйрәмнәрдә милли үзенчәлегебезне күрсәтер­гә тырышабыз. “Татарча диктант” ак­циясе дә популярлык яулый, анда катнашучылар, үз көчләрен сынап карарга телүчеләр саны елдан-ел арта. Узган елда ул, коронавирус пандемиясе сәбәпле, онлайн-форматта узды. Аңа да кырмыскалылылар актив кушылды.
Бөтенрусия, татар яшьләре сабантуйларында, фестиваль­ләрдә дә актив катнашып барырга тырышабыз. Халыклар дуслыгы, гаилә, кунакчыллык, җылылык, бердәмлек, туганлык символы бул­ган бәлеш бәйрәме – “Бәлеш­фест-2019”дан Гүзәлия Гыйззәту­л­лина зур тәэссоратлар алып кайтты. Узган елда ул онлайн-форматта оештырылган чарада да катнашты – итле бәлеш пешереп, видеоязмасын конкурска юллады.

Бүген туган телебезне яклау, аны тергезү, үстерү һәм саклау – иң мөһим мәсьәләләрнең берсе. Моңа мәдәни чаралар – йолалар, гореф-гадәтләрне тергезү, тормышыбызга кайтару, милли бәйрәм­нәр үткәрү нәтиҗәсендә ире-шергә мөмкин. Шул ук вакытта алар халыкны милләт итеп бер­ләштерү чарасы да булып тора. Шуңа бу юнәлештә эшне киләчәктә дә дәвам итү мөһим.
Эльвира ЯМАЛЕТДИНОВА.

Автор фотосы.