Үзән
+29 °С
Болытлы
Барлык яңалыклар
Гаилә учагы
9 февраль 2018, 13:56

Саф һавада - уен-көлке

“Балагызны түгел, үзегезне тәрбияләгез, барыбер алар сезгә охшарга тырыша” – диләр. Димәк, балагызның сәламәт булуын телисез икән, спорт белән шөгыльләнә башлагыз, гаиләгезне дә шуңа җәлеп итегез. Кырмыскалы авылының спорт-сәламәтләндерү комплексында “Гаилә” үзәге һәм “Яшьлек” яшьләр үзәге тарафыннан оештырылган “Гаилә белән бозда” дигән лозунг астында бәйрәм үткәрелде.

Көн салкын булуга карамастан, балалар кышны аеруча ярата, чөнки елның бу миз­гелендә актив ял итәргә - чанада, чаңгыда, тимераякта шуарга, хоккей һәм башка уеннар уйнарга мөмкин. Балагызның башлангычын хуплап кына калмыйча, үзегез дә анда актив катнашсагыз, бигрәк тә яхшы. Ял көннәрендә гаиләләре белән чаңгыга яки тимераякка басучыларны күрү аеруча куанычлы. Уфа шәһәреннән килгән профессиональ алып баручы Константин Лобов алып барган спорт бәйрәмендә сүз нәкъ шул турыда барды. Кышкы спорт төрләре турында зур булмаган викторинадан соң җыелучылар алдында Уфа шәһәренең 1нче санлы олимпия резервы спорт мәктәбендә шөгыль­ләнүче Александра Судакова фигуралы шуу буенча катлаулы элементларны җиңеллек белән генә башкарды. Фигуристканың чыгышын якыннан күреп, балалар аңа сокланып карап торды. Фигуралы шуу буенча осталык дәресендә дә төрле элементлар күрсәтелде.
- Тимераякта ныклы басып торган, гади булмаган күнегү­ләрне кабатлаган кызларыгыз миндә соклану хисе уятты, - диде Александра.
Константин үткәргән мавыктыргыч гаилә эстафетасында башка катнашучылар да бозда үзләренең осталыкларын күр­сәтте. Төрле киртәләр аша бер-берсен узып, кәшәкә белән шуу балаларга аеруча ошады. Алар­ның өшергә вакыты да булмады: хәрәкәт итү һәм белен белән кайнар чәй эчү кәефне тагы да күтәреп җибәрде. Авыл өстенә төшкән томан да бәйрәмгә комачаулый алмады, киресенчә, ниндидер могҗиза һәм әкият­тәгедәй атмосфера булдырды.
Җиңү яулаган Хәмитовлар, Латыйповлар һәм Галләмовлар гаиләләренә бүләкләр тапшыру иң дулкынландыргыч мәл бул­гандыр. Моңардан тыш, чара чикләрендә уенчык этләр күргәз­мәсе оештырылды. Балачактан төр­ле уенчыклар бәйләү белән шө­гыльләнгән һәм үз куллары белән ясаган уенчык авторлары – Кырмыскалы гимназиясе уку­чысы Лилә Нургалиева һәм Зилә Сәгыйтовага да бүләкләр тапшырылды.
Киләчәктә дә мондый бәй­рәм­нәр бер-берең белән таны­шыр­га, күбрәк белергә, дуслашырга булышлык итәр, дип ыша­нысы килә.
Рушания Хәмәтгалимова.
Читайте нас: