Балаларына үрнәк булып...

Агымдагы елның декаб­рендә Гөлфия белән Дамир­ның гаилә коруларына 15 ел тула. Алар танышканда Гөлфия кибеттән эшләгән була, ә Дамир эштән кайтышлый еш кына вак-төяк алырга керә. Шулай итеп, яшьләр дуслашып китәләр. Бераз очрашып йөрегәннән соң бер-берсеннән башка яши алмауларын аңлагач, гөрләтеп туй үткәрәләр. 20 ел буе буш торган әти-әнисенең йортын ремонтлап керәләр.

Гөлфия Башкортстан Рес­публикасы Башлыгы каршындагы Башкорт дәүләт хезмәте һәм идарәлеге академиясен тәмамлый. Бүгенге көндә Карлыман авыл Советы авыл биләмәсендә бухгалтер, ә Дамир «Русия тимер юллары” структура бүлекчә­сендә водитель булып эшли.

Хәлиуллиннар сөлектәй ике ул үстерәләр. Өлкәне Радмирга - 13 яшь, ул җәйге һәм кышкы спорт төрләре белән шөгыльләнә. Кечеләре Эльвир 4нче сыйныфта тик “5” билгеләренә генә укый, спорт белән дус, ләкин аның өчен уку – беренче урында.

Яңарак гаиләдә күңелле вакыйга булды. Гөлфия белән Дамирның күптәнге хыяллары тормышка ашты - аларның кызлары туды, аңа Даяна дип исем куштылар.

- Ирем белән алдан ук сөйләшеп куйдык: кыз туса – мин, малай туса, ул исем сайлый. Радиодан Даяна исемен ишетеп калдык, ул икебезгә дә ошады, - ди Гөлфия, шатлыгы белән уртаклашып.

Зур гаилә булып яшәү­ләренә Хәлиуллиннар куанып бетә алмый. Тормыш иптәше һәм балалары мох­таҗ­лыкта яшәмәсен өчен гаилә башлыгының күп вакыты эштә үтә. Аларның шатлыклы йөзен күрү – аның өчен зур сөенеч.

- Йортыбызда иң мөһим кеше, әлбәттә, балалары­бызның әтисе. Ул әйткән икән, димәк, шулай булырга тиеш. Балаларыбыз өчен үрнәк булырга тиешбез, чөн­ки алар безнең арттан кабатлый, безгә охшарга тырыша. “Балаңны түгел, үзең­не тәрбиялә”, дип юкка гына әйтмиләр бит, - ди Гөлфия.

Мондый дус һәм тату гаи­ләләрне күрү үзе бер куаныч. Алар өчен иң мөһиме, балаларын җылы һәм бәхетле мохиттә тәрбияләп үстерү.

Милена Шәймәрдәнова. Фото гаилә архивыннан алынды.