Тигез гомер итү – үзе бәхет

Фирүзә Якупова һәм Тәлгать Йомакаев моннан 25 ел элек Кырмыскалы авылына күченеп килә. Тәлгать Зәйнулла улы Линия-производство идарәлегенә урнашса, Фирүзә Катиф кызы 2002 елдан 2014 елга кадәр район үзәк дәваханәсендә тәэминатчы булып эшли.

Ил гизеп йөредек

Совет вакытында кеше­ләр еш кына күчеп йөри иде. Берәүләр чирәм җир­ләрен үзләштерергә китсә, икенче­ләрне башка республикага эшкә җибәр­деләр, өченчеләр себергә “озын акча” артыннан юлланды. Фирүзә Якупова һәм Тәлгать Йомакаев та тәүдә әти-әниләрен алып китсәләр, соңыннан үзләре генә күченә.

Тәлгатьнең әтисен Кыргызстанга эшкә тәга­енлиләр, гаилә­сен дә ул үзе белән ала. Шулай итеп, Тәлгать Ош шәһәрендә үсә. Тәүдә мәктәпне, соңыннан техникумны тәмамлый һәм Кыргыз­станның башкаласы – Бишкекка барып урнаша.

Фирүзә Катиф кызы­ның әти-әнисе Татарстанда өйләнешеп, яшәргә Пермь өлкәсенә китәләр. Балалары да аларның анда туа. Соңыннан Кыргызстанга, арытабан Укра­инаның Донецк шәһәренә күченәләр. 1976 елда Фирү­зә әнисе белән Бишкек шәһәренә кире кайтып, Приборлар төзү техникумында радиотехник бел­геч­­леге алып чыга һәм физприборлар заводына инженер-нормировщик булып эшли башлый.

Фирүзә Катиф кызы сөйлә­венчә, Тәлгать белән алар балачакан таныш. Яшь чакларында язышкан хатларын әле булса саклыйлар. Кыз яңадан Биш­кекка кайткач, 1979 елда яшьләр өйләнешергә карар итә­ләр. 1981 елда аларның уллары Вил­дан, ә 1984 елда кызлары Әлфия туа.

Икенче туган як

Гаилә башлыгы 14 ел Бишкек шәһәрендә Кыргызстан монтаж идарә­легендә электромонтер булып хезмәт сала. Илдә үзгәртеп кору чоры башлангач, гаиләсен әнисенең туган ягы – Башкортстанга алып кайтырга була. Балаларына университетта укырга якын булсын дип, башкалага якын авылны сайлый. Шулай итеп, 1993 елда гаилә Кырмыскалы авылына күченеп килә.

Тәлгать Зәйнулла улы Ленин урамында бәләкәй генә йорт сатып ала һәм Линия-производство идарәлегенә электромонтер булып эшкә урнаша.

- Бу предприятиедә эшләвемә 25 ел тулды, үзе бер юбилей. Агымдагы елда хаклы ялга чыктым. Кырмыскалы авылы безнең гаилә өчен икенче туган ягыбызга әйләнде. Биредә без фатир алдык. Балалар район үзәгендәге 1нче санлы мәктәпне тәмам­ладылар. Әлфия кызым кияү белән йорт салып керделәр, - ди Тәлгать Зәйнулла улы.

Фирүзә Катиф кызы әйтүен­чә, Кыргызстаннан кайтуы авыр булса да, ул һәрвакыт авыл җирендә, үз йортында яшисе килгән. Ниһаять, хыялы тормышка аша.

2002 елга кадәр ул сәүдә белән шөгыльләнә. Со­ңын­нан район үзәк дәва­ханәсенә тәэминатчы булып урнаша.

Тормыш мәгънәсе – балалар

Йомакаевларның тату һәм ныклы гаиләсендә балалары һәм дүрт оныклары – тормыш­ларының мәгънәсе.

- Әти-әниебез безгә югары белем алырга, гаилә корырга ярдәм иттеләр. Әле булса алар безнең турында хәстәрлек күрә, рәхмәт аларга, - ди балалары.

- Вилданның ике югары белеме бар, Уфа шәһәрендә яши, байтак еллар эшкуарлык белән шөгыльләнә.Ә Әлфия - журналист, район гәзите редакция­сен­дә эшли. Улымның Рамина һәм Рената исемле кызлары, кызым­ның Хамил һәм Чыңгыз исемле малайлары үсеп килә. Балаларыбыз – безнең юанычыбыз, горурлыгыбыз һәм ышанычыбыз, - диләр Йомакаевлар.

Фирүзә Катиф кызы бишенче ел инде пенсиядә. Шул вакыт эчендә ул район үзәгендәге мә­чет­тә гарәп теле курсларына йөреп, Коръән укырга өйрәнгән, йорт хуҗалыгы белән шөгыль­ләнә, онык-оныкаларын караша. Шул көннәрдә хаклы ялга туктаган Тәлгать Зәйнулла улының планнары башкача - яңа йорт салып керергә, умарта тотарга, сарыклар асрарга тели.

- Иң мөһиме, исән-сау булыйк, - ди ул сүз азагында.

Юлия СОЛТАНОВА.