Биргән вәгъдәләргә тугры алар

Бозаяз авылында яшәүче Ждановлар шатлыклы вакыйга кичерделәр – алтын туйларын бәйрәм иттеләр.

Икесе дә авыл хуҗалыгы институтын тәмамлаган. Рәшит Ислам улы инженер-механик булса, Рәсилә Мир­гасим кызы – зоотехник. Сылу Туймазы кызы­ның Бозаязга килен булып төшүенә 50 ел вакыт үтеп киткән.

Икесе дә сайлаган һө­нәрләренә тугры калдылар. Рәшит Ислам улы 35 ел буена урындагы хуҗалыкка җитәкчелек итте, аны районда гына түгел, республикада да алдынгы урынга чыгарды. Барлык өлкәләр дә уңай үзгәрешләр кичерде. Савым сыерлары, сарыкчылык “токымлы” ди­гән исемгә ия булды. Бөр­текле культураларның элиталы һәм югары продуктив орлыклары республи­каның төрле төбәкләренә сатылды. Производство биналары үсеп чыкты. Авыл эшчән­нәре өчен төзелгән йортлардан урамнар барлыкка килде. Юлларга, мәй­дан­нар­га асфальт түшәлде. Йорт­­ларга газ үткәрелде. Мәк­тәп, дәваханә, мәдә­ният учагы, сәүдә йортлары салынды. Шунысы куаныч­лы, Ждановларның тырыш хезмәте югары бәһа­ланды. Асылда, Рәшит Ислам улы орден һәм медаль­ләр белән бүләк­ләнде, РФ һәм БРның атказанган авыл хуҗалыгы хезмәткәре, ра­йонның Почетлы гражданины исеменә лаек булды.

Барлык казанышларда Рәсилә Миргасим кызының да өлеше бар. Ул үзе дә “Рес­пуб­­ли­каның атказанган зоотехнигы” дигән мактаулы исем йөретә.

Ждановлар ике ул тәр­бияләп үстерделәр. Радик һәм Илшат икесе дә югары белемле, өйләнгән. Хәзер ин­де өлкән Ждановларны оныклары үзләренең уңыш­лары белән сөендереп тора.

Юбилярларны республика җитәкчесе Радий Хә­биров исеменнән авыл би­ләмәсе башлыгы М.Р.Мә­­­җи­тов кайнар котлады һәм Рәхмәт хаты белән истә­лекле бүләк тапшырып, ныклы сәламәтлек, шатлык-куанычлардан торган озын гомер теләде.

Мидхәт Рәҗәпов.