Әйбәт күршеләр

Безнең бик әйбәт күршелә­ребез бар. Хисам бабай белән Гөлбикә әби. Бабай бик шаян кеше, үпкәләү, ачулануның нәр­­сә икәнен дә белми. Ни ге­­нә булса да, гел бергәбез: авыр­­лык килсә дә, бәй­рәм­нәрдә дә.

Беренче апрель көнне кемне алдарга икән дип йөредем-йөредем дә, шул күршелә­рем­не алдарга булдым. Бик оят булса да, аларны ягылмаган мунчага чакырдым.

Бабай:

- Керәбез, килен, керәбез. Нишләп кермәскә, беренче апрель мунчасы бит ул, - дип сөйләнеп калды. Ә мин тизрәк чыгып китү юлын карадым. Бераздан, чынлап та, алмаш киемнәрен күтәреп, миллек тотып, әби белән бабай мунчага киттеләр. Мин тиз генә чәй куйдым. Әй, оят, ләкин эш үтте – ышанып киттеләр бит суык мунчага! Байтак кына тордылар. Менә бер вакыт “ах” та “ух” килеп кайтып кер­­де­ләр. Битләрен әллә помада сөртеп кызартканнар, чәчләрен юешләгән­нәр. Чынлап та мунча кергән кешегә охшаганнар. Бабай ишектән керү белән:

- Вәт шәп булды, суык мун­ча димәссең дә. Кая, килен, эссе генә чәең бармы? Та­мак кибеп китте бит әле, - дип сөйләнә-сөйләнә арыган кыяфәттә лап итеп урындыкка килеп утырды. Ә әби елмаеп, шым гына тора. Үземнең юньсезлегемне ничек тә юарга тырышам. Башымны юләргә салып:

- Мунча әйбәт, бабай, хәзер чәй эчкәч үзебез дә барабыз, - дигән булам.

Тизрәк табын әзерләп, әби белән бабайга чәй ясап бирдем. Бабайның “капкалый” торган гадәтен белгәч, бер чәки дә чыгардым. Аллага шөкер, үпкәләү-нитү дигән нәрсә булмады. Беренче апрель икәнен искә төшереп, көлешә-көлешә чәй эчтек тә, күршеләрем кайтып киттеләр. Әйтәм бит: әби белән бабай бик әйбәт кешеләр.

Атна-ун көн үттеме икән, әбиләрнең оныкасы кереп, мине угыз коймагы белән чәй эчәргә чакырды. Мунча өчен оялу әле бетмәсә дә, әбигә -яу­лык, бабайга бүләккә түбә­тәй тотып, кереп киттем. Кер­сәм: әби белән бабай гырлап йок­лап яталар. Оныкалары өй­дә юк. Шым гына чыгып китим дигән идем, әби уянды да, сикереп торып чәйнүккә ябышты. Билгеле, мине чыгармадылар. Чәй кайнауга бабай да торып утырды. Өстәлдә ни бар, шуның белән кызыклар сөйли-сөйли чәй эчтек. Ә сыер әле бозауламаган, җилен башлаган гына икән.

Сәлимә Хафизова.

Сахай авылы.