Башкортстан ничек үзебезнекеләргә ярдәм итү үрнәгенә әверелде?

Бу ─ илдә беренче күләмле тикшеренү нәтиҗәсе, ил төбәкләрен махсус хәрби операциягә ярдәм итү эшенә җәлеп итүнең характерын һәм күләмен бәяләү омтылышы. Башкортстан бу рейтингта өченче урынны алды. Экспертлар билгеләвенчә, бу – бездәге чараларның комплекслы һәм системалы булуы нәтиҗәсе. Шәхсән Радий Хәбиров җитәкчелегендәге идарә командасы нәтиҗәле эш тәэмин итә алды. Асылда, безнең республика тәҗрибәсен башкаларга үрнәк итеп куялар. Аның үзенчәлеге нидә?

Үзебезнекеләргә фронтта…

«Башкортстан үзенекеләрен ташламый» дигән гыйбарә күптән инде киң таралыш алды. Фронттагы сугышчылар Башкортстанның үз егетләре турында зур хәстәрлек күрүен, кирәкле әйберләр белән даими рәвештә гуманитар ярдәм җибәрүен, ә өйдә яугирләрнең гаиләләренең бернәрсәгә дә мохтаҗ булмавын яхшы белә. Күп кенә хәрби хәбәрчеләр дә Башкортстанның фронтка һәм сугышчыларга ярдәме илдә иң яхшыларның берсе булуын билгеләде.

Без илдә беренче булып 2022 елда гуманитар конвой озаттык, ә алар барлыгы 144 булды. Моннан тыш, алгы сызыкка кирәкле әйберләр белән посылкаларны бөтен республикадан предприятиеләр, муниципалитетлар, битараф булмаган гражданнар даими рәвештә озата. Донбасста якташлары янында булмаган бер генә район хакимияте башлыгы да юк. Башкортстан гуманитар ярдәм китерүнең үз системасын булдырды: ЛХРда безнең логистик үзәк эшли, анда ярдәм заявкалар һәм ихтыяҗлар буенча бүленә.

Безнең табиблар чиратлап СВО зонасына солдатларга да, урындагы халыкка да ярдәм күрсәтергә бара, анда хәтта тешләрне дәвалау өчен заманча стоматология модулен дә китергәннәр. Безнең хатын-кызлар отрядлары СВО зонасындагы хәрби госпитальләрдә эшли, яралыларны карарга ярдәм итә.

... һәм тылда ярдәм итәбез

Биредә, тылда, СВОда катнашучылар һәм аларның гаилә әгъзалары өчен 40тан артык ярдәм чарасы эшләнде, алар шифаханәләрдә бушлай дәвалануны, балаларга белем бирүне, кайбер салымнардан азат итүне, көнкүреш проблемаларын хәл итүдә ярдәм күрсәтүне һәм башкаларны үз эченә ала. Бер генә хәрби хезмәткәрнең гаиләсе дә игътибарсыз калмый.

Радий Хәбиров бу процессны шәхсән үзе контрольдә тота, ул берничә тапкыр махсус операция зонасында, алгы сызыкта булды, яугирләрнең проблемалары һәм шатлыклары турында үзләреннән ишетү өчен алар белән даими аралаша.

Контракт хезмәте

Башкортстан контракт хезмәтенә җыюны оештыру, халык белән патриотик һәм аңлату эшләре алып бару буенча да үрнәк күрсәтә. Мобилизацион әзерлекне тиешле дәрәҗәдә оештыру ыгы-зыгы булдырмаска ярдәм итте, ә соңыннан безнең республика илне якларга әзерлеген эш белән исбатлады. Иреклеләрдән республикада хәзер данлыклыга әйләнгән Салават Юлаев, генерал Шәйморатов һәм Александр Доставалов исемендәге «исемле» башкорт батальоннары, ә соңыннан «Башкортостан» мотоукчылар полкы оештырылды. Республикадан иреклеләр агымы бүген дә кимеми.

Сугышчыларны тыныч тормышка әзерлибез

Республикада СВОда катнашучыларны тыныч тормышка адаптацияләү системасын да актив үстерәләр. Бу юнәлештә «Ватанны саклаучылар» фонды филиалы зур эш алып бара. Оборона министры урынбасары, дәүләт фонды рәисе Анна Цивилева Башкортстанда фонд эшен оештыру тәҗрибәсе, аерым алганда, берьюлы берничә шәһәрдә ярдәм үзәкләрен ачу уникаль һәм нәтиҗәле, шуңа күрә аны башка төбәкләргә дә таратачаклар, дип белдерде.

«Геройлар вакыты» федераль проекты рәвешендә Башкортстанда «Башкортстан Геройлары» кадрлар программасы эшли башлады. Әлеге программа буенча СВОда катнашучылар арасыннан предприятиеләрдә, оешмаларда, төрле дәрәҗә власть органнарында эшләү өчен квалификацияле идарәчеләр әзерләячәкләр. Беренче атнада ук 1000гә якын кеше анда катнашуга заявка биргән, бу аның таләп ителгән  булуы турында сөйли. Радий Хәбиров төбәк җитәкчеләреннән беренче булып хәрби бурычларын үтәү барышында аерылып торган СВОда катнашучыларны җаваплы постларга билгели башлады һәм киләчәктә дә моны эшләвен дәвам итәчәген белдерде. Ул шәхсән программада катнашучы берничә кешенең остазы булачак һәм аларны дәүләт идарәсе нечкәлекләренә өйрәтәчәк.

Альфир Сабиров, Кырмыскалы районы хакимияте башлыгы:

- Бүген без сугышчыларыбызның ышанычлы тылын ныгытуны, гуманитар йөкләр формалаштыруны һәм аларны китерүне оештыруны дәвам итәбез. 14 волонтерлык штабы Җиңүне якынайтуга бөтен көчен сала һәм күк йөзен бүген тыныч саклаучыларга күңел җылысы бүләк итә. Махсус операция зонасына гомуми көч белән 100 тоннадан артык авырлыктагы 50 гуманитар конвой җибәрелде. Якташларыбыз Ватанга тугрылык, батырлык, кыюлык һәм иң намуслы хезмәт белән җавап бирәләр. Уннарча кешенең бүләкләре, командованиедән Рәхмәт хатлары бар.

Галия Бикбаева, БР буенча “Ватанны саклаучылар” махсус хәрби операциясендә катнашучыларга ярдәм итү дәүләт фондының Кырмыскалы районындагы филиалы социаль координаторы:

- Безнең эш бер тәрәзә принцибы буенча алып барыла һәм без махсус хәрби операция ветераннарына, инвалидларга, аларның гаилә әгъзаларына һәм махсус хәрби операциядә һәлак булган катнашучыларның гаилә әгъзаларына тиешле чаралар алуда,  хакимият органнары белән аралашырга, килеп туган хокукый һәм көнкүреш мәсьәләләрен хәл итүдә ярдәм күрсәтәбез.