Үзәктә - хәвефсезлек мәсьәләсе

- Безнең бурыч – тантаналарны хәвефсез үткәрү өчен барлык шартлар тудыру, - диде муниципаль район башлыгы Альфир Сабиров, бәйрәм чорында хәвефсезлек тәэмин итү мәсьәләре буенча терроризмга каршы комиссиянең ачык утырышында.

Күзәтү астына алырга

Муниципаль район хакимияте башлыгы урынбасары Флизә Макеева Яңа ел тантаналары чорында клублар, мәктәпләр, балалар бакчалары һәм дәваханәләр аерым күзәтү астында булачак, дип белдерде. Имин булмаган гаиләләр, ә алар безнең районда 89 (анда 203 бала тәрбияләнә) күзәтү астында торачак. Авыр тормыш хәлендә калган һәм күпбалалы гаиләләрнең йортларына янгын турында хәбәр итүче 728 җайланма куелды.

Флизә Наил кызы кагылган тагы бер мәсьәлә - транспортта балаларны ташу. Әлеге вакытта 29 автобус укучыларны мәктәпкә алып килә һәм кайтарып куя. Мәктәпләрдә ЮХХДИ хезмәткәрләре белән берлектә дәрестән тыш чаралар, акцияләр үткәрелә. Мәктәп укучыларының юл хәрәкәте хәвефсезлеге турындагы хәлгә аңлатма биреп, Альфир Фәрхәт улы Яңа ел каникуллары чорында балалар өлкән­нәрнең күзәтүе астында булырга тиеш, дип белдерде.

Көчәйтелгән режимда

Район полициясенең участок уполномоченныйлары һәм балигъ булмаганнар белән эшләү бүлекчәсе начальнигы Данис Гали­әхмәтов билгеләвенчә, Яңа ел бәйрәмнәренә граждан­нарның хәвефсезлеген тә­эмин итү һәм террористик актларга юл куймау максатында шәхси состав җәлеп ителәчәк. Концерт куеласы урыннар тикшереләчәк, анда полиция һәм ЮХХДИ хезмәткәрләре дежурда торачак. Гыйнвар каникуллары чорында имин булмаган гаиләләр һәм исерткеч эчемлек сатучыларның йортлары буйлап рейдлар үткәрү планлаштырыла. Данис Гали­әх­мәтов шулай ук авыл билә­мә­ләрендә ирекле халык дружиналары эшен активлаштырырга кирәклеген әйтте. Фикер алышу барышында комиссия әгъзалары бәйрәм көннәрендә район үзәгенең төп мәйданына, ә Яңа ел төнендә район үзәгенең төп урамнарына керү юлларын ябарга, дигән карарга килделәр.

Янгыннарга юл куелмасын

Ел башыннан безнең районда 56 янгын теркәлде, анда дүрт кеше һәлак булды. Янгыннарның күбесе торак йортларда (23) һәм мунчада (20) чыга.

81нче янгын часте начальнигы Илдус Хәмитов әйтүенчә, янгын­нарның төп сәбәбе – эчкән килеш ут белән саксыз тотыну, шуңа да тәртипсез тормыш алып баручыларны аерым күзәтү астына алырга кирәк. Янгын чыккан очракта кешеләр еш кына кайда мөрәҗәгать итәргә кирәклеген белми. Күпләре 112 санын җыеп, Бердәм дежур-диспетчер хезмәтенә шалтырата башлый, бу дөрес түгел. Анда мөрәҗәгать итеп, сез Уфа диспетчерына эләгәсез, алар безгә хәбәр иткәнче вакыт үтә.

ЯНГЫН ЧЫККАН ОЧРАКТА, 101 САНЫ БУЕНЧА ШАЛТЫРАТЫРГА КИРӘК. Ул вакытта сез турыдан-туры Кырмыскалы районы­ның янгын сагына эләгерсез. 101 саны буенча шалтырату теләсә-кайсы кәрәзле элем­тә операторы өчен бушлай.

Муниципаль район хакимияте башлыгының тө­зелеш буенча урынбасары вазыйфасын башкаручы Артур Айбулатов белдерүенчә, Яңа ел көннәрендә торак-коммуналь хуҗа­лыгына эш­ләр өстәлә: су, электр уты һәм газ белән тәэмин итү, канализация системасында авария килеп туу ихтималлыгы арта. Табигать көй­сезлекләре дә тискәре йогынты ясарга мөмкин. Ләкин район кышкы чорга әзер, диде ул.

Гадәттә, яңа елдан соң кар һәм бураннар башлана. Шуңа күрә бәйрәм чорында техника әзер булырга: юллар әледән-әле чистартылып торырга тиеш, дип белдерде муниципаль район хакимияте башлыгы Альфир Сабиров.

Әлфия Әхмәдуллина.