Җирнең һәр гектары “эшләргә” тиеш

Кырмыскалы авылында Россельхознадзор идарәлегенең муниципаль җирләрне күзәтү астында тотучы органнары белән үзара эш итүне көйләүгә юнәлтелгән төбәк семинары үткәрелде.

Киңәшмәне муниципаль район хаки­мияте башлыгы Альфир Сабиров ачты:

- Авыл хуҗалыгы – район икъти­са­дының әйдәүче секторы. Авыл хуҗа­лыгы продукциясе җитештерү белән 19 авыл хуҗалыгы предприятиесе, 60 фермер хуҗалыгы шөгыльләнә. Узган елда игеннең тулаем җыемы 115 мең тонна, уңыш 30 центнерга якын тәшкил итте. Гомумән, бездә 111 мең гектар авыл хуҗалыгы басулары исәпләнә, аларның 70 меңе – сөренте җирләр. Буш билә­мәләр юк, барсы да тиешенчә файдалана. Барлык җирләргә дә инвентаризация үткәрелгән, - диде.

БР Россельхознадзор идарәлеге җи­тәк­чесе бурычларын башкаручы Алексей Гнездин әйтүенчә, республикада җиде миллион гектардан артык җир исәп­ләнә, аларның яртысы – авыл хуҗалыгы тәгаенләнешендә.

2014 елдан 2018 елга кадәр 1 миллион 300 мең гектардан артык мәйдан тикшерелде, ике меңгә якын хокук бозу очрагы теркәлде, административ җавап­лылыкка тарттыру буенча 1200 карар чыгарылды, 18 миллион сумлык штраф салынды. Урыннарда авыл хуҗалыгы тә­гаенләнешендәге җирләр вәкаләтле җитәкчеләр һәм органнар карамагында. Килешүгә ярашлы, алар Россельхознадзор белән бергә эшли. Безнең район, мә­сәлән, аның белән 2013 елда ук килешү төзеде.

Киңәшмәдә байтак көнүзәк мәсь­ә­­лә­ләр тикшерелде. Аларның берсе – авыл хуҗалыгы тәгаенләнешендәге җирләрдә өлешләтә катнашучылар белән эш алып бару. Ул җирләрне файдаланганда җитешсезлекләрне - мә­сәлән, басудан туфракның өске катламын чыгару, чүп үләннәре үстерү, каты көнкүреш калдыклары түгү, чәчү мәйданнары буйлап зур йөк машиналары йөрүне терки бару мөһим.

Чарада республиканың 11 муниципалитетыннан авыл хуҗалыгы начальниклары, җирләрне күзәтү астында тотучы оешма җитәкчеләре, шулай ук безнең районның авыл биләмәләре баш­лыклары катнашты. Семинар бел­геч­ләр өчен дә файдалы булды. Би­редә алынган мәгълүмат җирләрнең торышын тикшереп, чаралар күрергә ярдәм итәчәк, чөнки аның һәр гектары “эшләргә” һәм файда китерергә тиеш.

Әлфия ӘХМӘДУЛЛИНА.