Кыш көйсезлекләре куркытмый

Кар көртләренең машиналар хәрәкәтенә комачаулавы, кешеләрнең урамда тездән кар ерып йөрүе гадәти хәлгә әйләнде. Хәер, соңгы елларда бу проблеманы хәл итү авыр түгел - җитештерүчәнле заманча техника бер тоткарлыксыз автомобиль юлларын кардан чистарта. Авылларда да элекке кебек кар озак ятмый. Район хакимияте һәм авыл билә­мәләренең җаваплы хезмәт­кәрләре урыннарда эшләрнең ничек баруы белән таныштырды.
Артур Айбулатов, район­ның баш архитекторы:
- Районның күп кенә хезмәтләре юлларны кардан чистарту эшенә бик җитди карый. Юл хезмәткәрләре тәүлек әйләнәсе диярлек эш­ли, ягулык-майлау материаллары җитәрлек, белгечләр тарафыннан дежурлык оештырылган. Идарә итүче компа­нияләр ихата алларына аеруча игътибар бирә, йорт­ларның түбәләре боздан һәм кардан тазартыла.
Фәнүр Гайнуллин, Яңа Кыешкы авыл биләмәсе башлыгы:
- Гомумән, авыллар арасындагы юллар ачык. Әк­ренләп авыл урамнары да кардан азат ителә. Шулай, Морза һәм Мөкәй авыллары билә­мәләре тулысынча диярлек чистартылды. Шул ук вакытта үзәк усадьбада һәм Үтәгән авылларында проблема бар әле. Бу эштә авыл билә­мәсенең тракторы мәшгуль, шулай ук шәхси техникасы булган авыл халкы да ярдәм күрсәтә.
Мөнир Гыйззәтуллин, Карлыман авыл биләмәсе башлыгы:
- Авыл Советына караган барлык авылларда да юллар такыр. Авыл Советы, коммуналь хезмәтләр һәм аерым кешеләрдә булган техника тарафыннан урамнарны кардан чистарту эше тукталмый.