Гүзәл Назарованың 3D-бизнесы

Гүзәл Мәүләви кызы моннан 3 ел элек гаиләсе белән Иске Кыешкы авылына күчеп килә һәм эшкә урнашырга уйлый. Кече улын мәктәпкә илтергә, ә дәрестән соң алып кайтырга кирәк, ә авылда аңа туры килгән эш табылмый. Район үзәгенә һәм Уфа шәһәренә йөреп эшләргә ерак. Нәтиҗәдә, Гүзәл үз эше белән шөгыльләнергә карар итә.

Башта Гүзәл Назарова макрама стилендәге гамаклар һәм хатын-кызлар өчен аксессуарлар үрү белән мавыга. Әмма тиздән 3D-модельләштерү белән кызыксына башлый. Интернет челтәрендә ул 3D-принтерда эшләнмәләр ясау белән шөгыльләнүче кешеләр белән таныша һәм бу эшнең барлык нечкәлекләрен өйрәнә.

- Үземне 3D-модельләштерүдә сынап карарга булдым. Әмма корылмалар һәм материаллар сатып алу өчен акча кирәк иде. Бинаны арендага алу хакы да озсыз түгел. Шул вакытта акча табу вариантларын эзли башладым һәм очраклы гына “социаль контракт төзү нигезендә адреслы ярдәм” программасы турындагы мәгълүматка тап булдым.

Районның халыкны эш белән тәэмин итү үзәгенә килдем, монда барысын да аңлаттылар. Бизнес-план төзеп, аны “Дәүләт хезмәтләре” порталы аша җибәрдем, - дип уртаклашты әңгәмәдәшче.

Гүзәл Мәүләви кызының сүзләренә караганда, соңыннан аны проектны яклау өчен район хакимиятенә чакырганнар.

- Беренче тапкыр үтмәдем, ләкин мин бирешмәдем. Бизнес-планга төзәтмәләр керттем һәм яңадан гариза бирдем. Комиссия бертавыштан проектымны хуплады. Һәм узган елның апрелендә мин үз хыялымны тормышка ашыру өчен дәүләт ярдәме сыйфатында 350 мең сум акча алдым. Район хакимияте башлыгы Альфир Сабировка, муниципалитетның бизнес-шерифы Рәсил Исламовка, шулай ук халыкны эш белән тәэмин итү үзәге җитәкчелегенә һәм хезмәткәрләренә күрсәткән ярдәмнәре өчен рәхмәт белдерәсем килә, - диде ул.

Килешү шартлары нигезендә, дәүләт корылмалар сатып алуга ике ай вакыт биргән. Бу акчага Гүзәл ике 3D-принтер, өстәлләр, стеллажлар, ноутбук һәм принтер сатып алган. Һәм эшкә тотынган.

- Изделиеләр җитештерү өчен кукуруз чималы нигезендә материал файдаланыла. Ул кеше сәламәтлеге һәм тирә-як мохит өчен хәвефсез, - дип сөйләде ул.

Эшкуарның ассортиментында төрле уенчыклар, брелоклар, статуэткалар һәм сувенирлар бар.

Моннан тыш, Гүзәл Назарова пилотсыз очкычлар өчен детальләр әзерләү эшенә кушыла. Бу турыда ул күп сөйли алмый. Әмма хәрби хәрәкәтләр зонасында булган безнең ир-егетләргә ничек тә булса ярдәм итүенә бик шатмын, дип билгеләп үтте.

- Минем дусларымның, танышларымның күбесе Ватаныбызны саклый. Сугышчыларга ярдәм итүне арытабан да дәвам итәчәкмен, - дип ассызыклады эшкуар.

Гүзәл Мәүләви кызы район чараларында актив катнаша. Аны шулай ук мәктәп укучылары белән очрашуларга чакыралар. Авторның гадәти булмаган эшләнмәләренә районда гына түгел, республикадан читтә дә ихтыяҗ зур.

Гүзәл Назарова үз эшен уңышлы тормышка ашыра. Күптән түгел ул тагын берничә 3D-принтер сатып алган һәм үзенә ярдәмче алырга уйлый. Без аңа изге эшендә иҗади уңышлар телибез.

- Эш башлаучы эшкуарлар өчен теләсә нинди ярдәм мөһим. Без аны республика һәм район программалары чикләрендә күрсәтергә тырышабыз. Узган ел социаль контракт нигезендә 23 кеше ярдәм алды. Ярдәм күләме һәркемгә 350 мең сум тәшкил итте. Мәшгульлек үзәге линиясе буенча бизнесны үстерү өчен тагын ике кеше 164 мең сум акча алган. Мәшгульлек мәсьәләләрен хәл итүгә “Демография” милли проекты да ярдәм итә. Аның чикләрендә - 18, башка программалар буенча тагын 9 кеше белем алды. Инвалидлар өчен ике эш урыны булдырылды, - диде район хакимияте башлыгының эшкуарлыкны үстерү мәсьәләләре буенча урынбасары Рәсил Исламов.

- Башкортстанда кече һәм урта эшкуарлыкта 593,3 мең кеше эшли. Узган елда республикада кече һәм урта предприятиеләр, микропредприятиеләр саны артты. Үзмәшгульләр күбәйде. 2024 елда дәүләт ярдәменең гомуми суммасы 1 миллиард сумнан артып китте, шуның 445 млн сумы “Кече һәм урта эшкуарлык” илкүләм проекты чикләрендә бүлеп бирелгән, - диде Башкортстан Республикасы башлыгы Радий Хәбиров.

Галия Кәримова.