Горурланып сөйләрлек язмыш

Районның сәламәтлек саклау өлкәсенә ул дүрт дистә ел гомерен багышлады. Сугыштан соңгы авыр елларда фельдшер булып эш башлап, район­ның башка медицина хезмәт­кәрләре белән берлектә эпи­де­мияләргә каршы кө­рәшә, авыр шартларда сугышта йончыган халыкка медицина ярдәме күрсәтә. Табиблар җитешмәгәнлектән, фельд­шерга барлык җавап­лылыкны үз иңенә алып, катлаулы хәлләрдә еш кына карарлар кабул итәргә туры килә.

1948 елда Стәрлетамак медицина техникумын тәмам­лап, Әнвәр Кәлимулла улы башта Бишаул-Уңгар, соңын­нан Иске Кыешкы фельдшер-акушер пунктларында эшли. 50нче еллар башында ул Кырмыскалы дәваханәсенә кү­черелә. Терапевтлар булмау сәбәпле, аңа пациентларны кабул итү бурычы да йөк­ләтелә. Төрле эпидемияләр, авыручыларның саны күп булу сәбәпле, ул тиз арада һөнәри тәҗрибә туплый. Хезмәттәшләре һәм Кырмыскалы авылы халкы хәтер­ләвенчә, ул эшен җиренә җиткереп, зур осталык белән башкарган, диагнозларны да төгәл куйган. Ул елларда бернинди аппаратура булмаган, шуңа да медицина хезмәткәре үз белеменә һәм тәҗрибәсенә таянып эш иткән.

Сәламәтлек саклау ветераны Юлдашева Эльза Мортаза кызы:

- 1969 елда дәваханәгә практика үтәргә кайтканда, Әнвәр Кәлимулла улы авыруларны кабул итә иде. Кө­ненә аңа мөрәҗәгать итүче­ләрнең саны 50дән дә артып китә иде. Тиздән мин диплом алып, Кырмыскалы дәваха­нәсенә эшкә кайттым. Шул елларда гына безнең дәва­ханәдә тера­певт эшли башлады. Ә.К.Сәй­фуллин бу урын­да 15 елдан артык хезмәт итте.

Әнвәр Кәлимулла улы шулай ук ашыгыч ярдәм хезмәте барлыкка килгән елларның башында торды. 1971 елда баш табиб Д.А.Булатовның боерыгы буенча кичке сәгать биштән соң ашыгыч ярдәм буенча дежурлык оештырыла. Ул бурычларны башкару Әнвәр Сәйфуллин һәм Флорида Назыйровага йөкләтелә. Соңыннан хезмәткәрләр би­редән төрле участокларга бер-бер артлы китеп тордылар, ә Әнвәр Кәлимулла улы пен­сиягә кадәр бу вазыйфасына тугры калды.

Эшләү чорында ул үзен оста оештыручы буларак та күрсәтте. Бәлки шуның өчен дә ул озак еллар дәваханәнең башлангыч партия оешмасына җитәкчелек иткәндер, соңыннан аңа райондагы Кызыл Хач һәм Кызыл Ай җәм­гыятен төзергә кушалар. Өс­тәвенә, фельдшер-акушерлык пунктлары төзүдә, донор көне үткәрүдә дә катнаша. Кыскасы, коллективта ул ихтирам казанды, аның фикере белән килештеләр.

Ашыгыч ярдәм бүлеге фель­дшеры Ялсина Рәшидә Газим­җан кызы:

- Миңа Әнвәр Кәлимулла улы белән 1981 елдан башлап, ул хаклы ялга киткәнче, бергә эшләргә туры килде. Ул эшенә зур җаваплылык белән караган тәҗрибәле фельдшер иде. Безнең өчен ул изге күңелле нәсыйхәтче дә булды. Кайчакта “ашыгыч ярдәм” хез­мәтендә дүрт фельдшер урынына икәү генә калган чаклар да булды. Әнвәр абый беркайчан да дежурстводан баш тартканы булмады. Өлкән буын кешеләре әле булса үзләренең ихтыяр көче ныклы булулары белән сокландыра. Ә.Сәйфуллин нәкъ шундый кеше иде.

Ашыгыч ярдәм бүлеге фель­дшеры Аллаярова Рима Габдулхай кызы:

- Әнвәр Кәлимулла улын 1970 елдан бирле беләм. Ул вакытта мин, Алайгыр участок дәваханәсендә эшләгән яшь фельдшер, аңа авыруларны алып килә идем. Ул А.Юма­­дилов белән чиратлап авыруларны кабул итте. Лә­кин кешеләр күбрәге Ә.Сәй­­фуллинга мөрәҗәгать иттеләр. Тиздән мин үзем дә Кырмыскалы дәваханәсендә эшли башладым. Хәзер байтак вакыт үткәч, мин аның үзенең һөнәрен шул кадәр яратып башкаруын аңладым. Шундый кешеләр генә авыр участокта озак еллар эшли ала. Әнвәр абый һәрвакыт мох­таҗ­ларга ярдәмгә ашыкты. Фельдшерлар арасында аңа югары категория бирелде. Ул, чынлап та, югары квалификацияле белгеч һәм ачык йөзле кеше иде. Без аны онытмыйбыз.

Беребез дә дөньяга мәң­гелеккә килмәгән. Ләкин ул ярдәм күрсәткән һәр кешенең йөрәгендә аның турында якты хатирәләр яши. Ә мондый кешеләр аз түгел. Аларның һәрберсенең тормышына Әнвәр Сәйфуллин мөһим өлеш керткән.

Рәмилә Сәйфуллина.