Кисәтүгә караганда, булдырмау яхшы

Статистика буенча, янгыннарнаң 80 проценттан артыгы торак секторына туры килә. Алар­ның һәр өченчесе - ут белән сыксыз тотыну, һәр дүртенчесе - электр корылмалары­ның һәм һәр алтынчысы мич­ләрнең төзек булмавы нәтиҗәсендә килеп чыга.

Янгыннарны кисә­түгә караганда, булдырмау яхшы. Йортны янгыннардан саклау, ди­мәк, милкеңне, гоме­рең­не һәм сәламәтле­геңне куркыныч астына куймау, дигән сүз. Шу­ның өчен йортыгыз яки фатирыгызның янгын хәвефсезлеге кагыйдә­ләренә туры килүен тикшереп чыгу артык булмас.

Йортыгыз мич бе­лән җылытыла икән, өч айга бер тапкыр булса да төтен юлларын корымнан чистартып торыгыз. Мичне бел­геч­ләр генә салырга һәм ремонтларга тиеш. Андагы ярыклар һәм төтен чыккан урыннар күренеп торсын өчен аны агартырга кирәк. Мич алдындагы идәнгә 50х70 сантиметр зурлыгындагы калай җәе­лергә, артык кызудан саклау өчен тәүлегенә 2-3 тапкыр гына ягарга, аларның арасы 1,5 сәгатьтән артмаска тиеш. Мичне яндырып җибәрү өчен бензин һәм башка тиз ут кабучан сыекчалар кулланырга ярамый. Балаларга мич ягарга рөхсәт итмәгез.

Йорт газ яки электр уты ярдәмендә җылы­ты­лса да, ул хәвефсез­лек чараларын үтәүне таләп итә. Төзек корылмалар гына файдалану, аларны файдалану ка­гый­дәләре язылган инс­трук­цияләрне төгәл үтәү - хәвефсезлекнең төп шартлары.

Ут белән саксыз тотынган кеше үзе һәм тирә-яктагылар өчен дә зур хәвеф тудыра. Иске электрүткәргеч, төзек булмаган мич, яткан килеш тәмәке тарту, сүндерелмәгән шырпы яки тәмәке төпчеге - барысы да янгынга ките­рергә мөмкин.

Янгын яки башка фаҗигане күрү белән шунда ук 112 телефоны буенча хәбәр итегез. Бу очракта һәр минуты кадерле.

Рәис Хисмәтуллин, янгын күзәтчелеге буенча дәүләт инспекторы.