Мул уңышка нигез бүген салына

Гомерен бу тармакка ба­гыш­лаган тәҗрибәле механизатор Василий Иванушкин (рәсемдә) теләсә-кайсы техникада ябык күз белән эшли ала.

- Ике елдан соң пенсиягә чыгам, ләкин исәнлек булганда һәм хуҗалар рөхсәт иткән­дә эшләячәкмен әле, - ди механизатор.

Ләкин Василий Иванушкин кебек белгечне җитәк­челек хаклы ялга җибәрергә ашыкмый.

- Үз эшенең остасы ул, - ди аның турында предприя­тиедә 20 елдан артык эшләүче бригадир Илдар Мусин, - барлык ашлык аның куллары аша үтә.

Предприятиедә тәүлек әйләнәсе барлыгы 50 кеше эшли. Кыш көне барлык чәч­кечләр, җир эшкәртүче культиваторлар ремонтланды. Технопаркта 20 берәмлек техника, шул исәптән ике яңа “Ама­зон” чәчкече, яңа К-744 тракторы, “Версатейл”, “Нью Холланд” комбайннары, “Т-150”, “Белорус-1221” тракторлары бар.

Җәмгыятьтә өченче ел эшләүче агроном Рөстәм Бикмәтов чәчүгә әзерлек турында сөйләп үтте.

- Чәчү эшләре 12 мең гектардан артык мәйданда башкарылачак. Шуларның 2,6 мең гектарында “Безенчукская” (Суперэлита) һәм уҗым арышының “Чулпан” (Элита) сорты чәчеләчәк. 2300 гектарда - сабан ашлыгын, шул исәптән 501 гектарда бодай, 1653 гектарда - арпа, 146 гектарда – солы һәм 114 гектарда карабодай чәчәргә ниятлибез. Шулай ук 308 гектарда – борчак, 1315 гектарда кукуруз урын алачак, аның 865 гектары силоска, ә калган 450 гек­тары ашлыкка китәчәк. 2340 гектар мәйданда көнба­гыш чәчеләчәк. Агымдагы елда 1081 гектар мәйданны - күпьеллык, ә 191 гектарны берь­еллык үләннәр биләячәк. Пар җире өчен 1868 гектарга якын җир бүленгән, - диде Рөстәм Бикмәтов.

Бригадир Илдар Мусин җитештерүчәнлеге сәгатенә 150 тоннага якын булган иген чистарту комплексы белән таныштырды.

- Чистартылып һәм кипте­релгәннән соң, иген “үз сәга­тен көтеп” келәтләрдә сакла­на. Ләкин яз гына килергә ашыкмый. Шулай да агымдагы елда уңыш мул булыр, дип өмет итәбез, чөнки “Артемида” да җирләр уңдырыш­лы, - ди Илдар Хәмит улы.

Ринат Шәйбәков.

Автор фотосы.