Монда җитен дә үстерелә

Районның авыл хуҗалыгы пред­приятиеләрендә урып-җыю эшләре дәвам итә. Без килгәндә “Крона” җәмгыяте игенчеләре Таусеңер авылы янындагы 286 гектарлы басуда отышлы техник культура - җитен игү белән мәшгуль иде. Дәүләкән районыннан командировкага килгән Сергей Чебаев югары җитештерүчәнле комбайнда зур тырышлык салып эшли. Уңыш ташуда урындагы авыл хуҗалыгы пред­приятиесеннән ГАЗ-53 машинасы водителе Наил Суфиянов мәшгуль.

Механизаторларның сүзләренә караганда, көненә якынча 116 центнер җитен чабыла. Һәр гектардан уңыш якынча 10 центнер тирәсе. Әйткәндәй, Наил Әбдел­нәгыйм улы тумышы белән Иске Акташ авылыннан. Хезмәт эшчәнлеген 1981 елда башлап җибәргән. Тормыш иптәше белән өч бала үстергәннәр. Улы да әтисе юлыннан киткән – хуҗалыкта шофер булып эшли.

- Агымдагы елда җитен тәү тапкыр чәчелде. Бу безнең як өчен яңа культура тәүдә җентекләп өйрәнелде. Гомумән, әлеге яңа юнәлеш безнең эшчәнлеккә, хуҗалык үсешенә яңа этәргеч бирер дигән өметтә калабыз, - диләр хуҗалыкта.

Игенчеләрнең хезмәте тырышлыкларыннан тыш, табигать шартларына да турыдан-туры бәйле. Шуңа күрә аларга аяз көннәр телисе килә. Ә җир уллары үзләренең эшен намус белән башкарып чыгар.

Венера Гафарова.

Фирүзә Рәхмәтуллина фотосы.