Аттестатлар яңача биреләчәк

Мәктәптән нинди дә булса сәбәп аркасында аттестатны алалмаган чыгарылыш сыйныф укучыларына аның сканерланган күчермәсен соратып алырга мөмкин булачак. Мәгариф һәм фән министрлыгының тиешле боерыгы норматив хокукый актлар проектларының федераль порталында урнаштырылган.

“Чыгарылыш сыйныф укучысы электрон формада аттестатның оригиналы күчермәсен җибәрүне сорап, белем бирү оешмасына мөрәҗәгать итәргә хокуклы”, — диелә боерыкта.

Документ нигезендә, белем бирү оешмасы, тиешле мөрәҗәгать алганнан соң, өч календарь көн эчендә чыгарылыш сыйныф укучысына аттестат оригиналының күчермәсен җибәрә.

Аттестатның төп нөсхәсе чыгарылыш сыйныф укучысының шәхси эшендә аның ихтыяҗына кадәр сакланачак.
Элегрәк хәбәр ителгәнчә, мәктәп аттестатлары QR-кодлар белән маркировкалана башлаячак.