Ташламалар да, татлы бүләкләр дә...

Бөтенрусия матбугат декадасы чикләрендә узган җомга көнне Кырмыскалы почтамтында йолага әверелгән Гәзиткә язылучылар көне үткәрелде. Анда район гәзите редакциясе дә катнашып, үзенең укучылары белән күзгә-күз очрашып сөйләшә, фикер алыша алды. Шуны да билгеләп үтәргә кирәк, почта хезмәткәрләре белән берлектә үткәрелгән бу чара матбугат басмаларына язылучыларның күңелендә җылы хатирәләр белән озак саклансын өчен без чын бәйрәм ясарга тырыштык.

Иртән-иртүк күңелле музыка район үзәгендә яшәүчеләрне дә, кунакларны да почта бүлекчәсенә чакырды. Ә анда Кыш бабай һәм Карсылу катнашлыгында бай программа көтте. Алар почта бүлекчәсенә килгән һәр кешегә бүләкләр таратты, шаян сүзләре һәм изге теләкләре белән күңелләрен күтәрергә тырышты.

Бүгенге заманда кешеләрнең күбесе мәгълүматны интернеттан алуга карамастан, кәгазь басмаларны үз итүчеләр дә күп әле. Менә алар бу көнне икеләтә отты, дисәм дә ялгышмам, чөнки яраткан басмаларына ташламалы хакларга язылу белән беррәттән, бихисап бүләкләргә дә ия булдылар. Почта хезмәткәрләре һәр язылучыга китаплар, журналлар, календарьлар бүләк итсә, район гәзите редакциясе татлы призлар таратты.

Почтамтның матбугат бүлеге инструкторы Д.П.Иванова сүзләре буенча, бу көнне тутырылган квитанцияләр буенча район гәзите алда бара – берничә сәгать эчендә генә 30га якын кеше район басмаларына язылырга өлгергән. “Башкортстан”, “Киске Өфө”, “Республика Башкортостан” гәзитләренә язылучылар да байтак булды. Шулай ук “Диләфрүз”, “Манзара”, “1000 киңәш” гәзитләренең популяр булуын кыю әйтә алабыз – эчтәлекле һәм әллә ни кыйммәт булмаганлыктан, аларга язылучылар бихисап иде.

Матбугат кампаниясенең кызу чоры бара. Яраткан басмаларга язылырга өлгермәгәнсез икән, ашыгыгыз – 10 декабрьгә кадәр дәвам иткән декада вакытында сез өстенлекле хаклар буенча гәзиткә язылып, акчагызны янга калдыра аласыз.

Акция чикләрендә “Үзән” гәзитенә (индексы 00061) язылу 10 процентка кимегән һәм ул 6 айга – 751 сум 74 тиен, шимбә санына (индексы 00601) язылу 542 сум 88 тиен тәшкил итә. Ә инде бер елга язылганда ул сезгә 1375 сум 54 тиенгә төшәчәк.

Эльвира Ямалетдинова.

Читайте нас:

Телефон

8(34765) 2-32-85

Электрон почта

[email protected]

Адресы

РБ Кармаскалинский район, с. Кармаскалы, переулок Речной , 7

Реклама хезмәте

83476523285

Редакция

83476523283

Кабул итү бүлмәсе

83476523285

Хезмәттәшлек

83476523285

Кадрлар бүлеге

83476523285