“Исәнмесез, мин сезнең участковый!”

Рейдның бурычы – йортлар буйлап йөреп чыгу, анда яшәү­челәргә җинаятьләр һәм хокук бозуларны кисәтү максатында саклык чаралары турында аңлату. Полиция хез­мәткәре һәр кеше белән шәх­сән таныша, аларның проблемалары белән кызыксына һәм бәй­ләнешкә керү өчен мәгълүмат­лар күрсә­телгән “визитка”ларын калдыра. Участ­ковыйның бурычына имин булмаган гаилә­ләр, йортла­рын­да корал саклаучылар, нарколог яки психиатрда исәп­тә торучы, шартлы рә­вештә төрмәдән азат ител­гән, җәм­гыятькә куркыныч тудырган шәхесләрне һәм шулай ук тәр­биягә начар бирелүче үсмер­ләрне тикшерү дә керә. Шулай ук буш торучы каралтылар һәм подваллар да тик­шерелә.

Карлыман авыл Советы биләмәсендә рейдка без полициянең участок уполномоченные, полиция капитаны Р.З.Әминев белән бергә чыктык. Рөстәм Зыя улы бу ва­зый­фада 2006 елдан бирле эшли. Аның карамагында 6 меңгә якын кеше яшәүче сигез авыл исәпләнә.

1 апрельдән, хезмәттәше отпускада вакытта, Сахай авыл Советы буенча вакытлыча участковый вазыйфасын да башкара.

- Эш күләме артуга карамастан, үземә йөкләтелгән эшләрне төгәл үтәргә тырышам. Һәр кеше белән уртак тел табу өчен психолог та булырга туры килә, чөнки төрле холыклы кешеләр очрый, - ди ул.

Олыкүл авылының К.Маркс, Кунакбаев һәм башка урамнары буйлап үтеп чыктык һәм җитди хокук бозу очраклары теркәлмәде. Шунысы куанычлы, участковый исе­менә авыл халкыннан тик мактау сүзләр генә ишетергә туры килде.

Марсель Рәшитов.