Янгыннарны булдырмас өчен

Кызганычка каршы, Кырмыскалы районы бу исәпкә керә, шуның өчен 1 марттан 31 майга кадәр көндәлек профилактик чаралар үткәрү өчен муниципаль штаблар эшләячәк. Безнең районда профилактик төркемнәрнең эшен БР гражданнар оборонасы һәм гадәттән тыш хәлләр буенча уку-методика үзәге начальнигы Тәлгать Нәгыймов тикшерде. Кырмыскалы, Шәйморатов һәм Иске Муса авыл биләмәләренең хакимият вәкилләре белән очрашулар үткәрелде.
- Райондагы өч штабның эшен тикшереп чыктык. Профилактик төркем­нәрнең барсы да эшли, рейдлар буенча отчет тапшырдылар. Арытабан башка авыл биләмәләренә дә барачакбыз. Тиздән дача мизгеле башлана. Димәк, эшләр тагы да өстәләчәк. Кырмыскалы районы биләмәсендә бакча шир­кать­ләре урнашкан. Алар белән дә эш алып барырга кирәк булачак. Хәтерегезгә төшерәм, янгын турында хәбәр итүче корылмалар булган йортларда хәвеф­сезлек дәрәҗәсе берничә тапкыр арта. Бу корылма ярдәмендә республикада бик күп кешеләрнең гомере коткарып калынды, - диде Тәлгать Шәүкәт улы.
Рейдта катнашучылар бәләкәй балалары булган гаиләләргә аеруча игътибар бирәләр. Шулай, алар Иске Муса авылындагы Юламановлар һәм Юл­дашевларның гаиләләрендә булдылар.
Кырмыскалы районының гражданнар оборонасы һәм гадәттән тыш хәл­ләр буенча баш белгече Айдар Мө­­хәм­мәтҗанов балаларда бәлә­кәй­дән үк гаиләләре өчен җаваплылык той­гысы тәрбияләүче укытучыларның хезмәтен һәм рейд вакытында бала­ларның хәвефсезлек нигезләре буенча сорауларга дөрес җавап бирүен бил­геләп үтте.
БР Янгынга каршы хезмәт буенча инженер Фаяз Мәсәгутов күпбалалы гаиләләргә янгын турында хәбәр итүче автоном корылмалар тапшырды һәм элек урнаштырганнарын тикшереп чыкты.
- Әлбәттә, элекке кебек һәр урамда, һәр йортта ком салынган тартмалар куеп чыкканда яхшы булыр иде, чөнки ул янгын сүндерүнең сыналган ысулы, - диде ул.
Айгөл Нуриева.