Үзән
+29 °С
Болытлы
Барлык яңалыклар
Синең кешеләрең, авыл
13 февраль 2018, 18:01

Җырларым белән яшьлегемә кайтам

Композиторларның музыканы тыңлау гына түгел, ноталар тезеп, аны халыкка җиткерү сәләте дә бар. Шундый талантлы шәхесләрнең берсе - шагыйрь, җырчы һәм музыкант Фәрит Яхшыголов яңарак үзенең 55 яшьлек юбилеен билгеләп үтте. Бу уңайдан 16 февральдә район Мәдәният сараенда “Җырларым белән яшьлегемә кайтам” дип исемләнгән концерт үткәрелә.

Фәрит Миңлегәрәй улы 1962 елда Архангель районының ямьле Инҗәр елгасы буенда урнашкан Абзан авылында туа. Әтисе Миңлегәрәй Габбас улы һәм әнисе Хәлимә Хәлим кызы - гади колхозчылар. Гаиләдә җиде бала үсә.
Фәрит Яхшыголов мәктәптә укыганда ук музыкага тартыла. Апасы­ның туенда җизнәсенең гармунда уйнаганын күреп, аның да бу музыка коралында уйнау теләге барлыкка килә. Акча җыеп, бәләкәй генә булса да гармун сатып алырга хыяллана ул. Шулай итеп, йорттагыларга комачауламас өчен ул елга буена төшеп, ә кыш көне мунчага бикләнеп гармунда уйнарга өйрәнә. Остара төшкәч, кулына баян ала. Мәктәпне тәмамлаганнан соң 3 ел Уфада токарь булып эшли. Тормышын музыкадан башка күз алдына китерә алмаган Фәрит заводтан китеп, Стәр­летамак шәһә­рендәге мәдә­ни-агарту училищесында музыкаль белем ала. 24 яшен­дә Гөлфия Юнысованың “Көнләшәм” шигыренә көй яза. Бу аңа тагы да дәртләнеп эшләргә көч һәм канат бирә, аның тагы да әсәр­ләр язу те­ләге барлыкка килә.
Белгечлеге буенча Фәрит Миң­легәрәй улы 2004 елда гына эшли башлый. Район Мәдәният сараена эшкә чакыру алу белән Кырмыскалы авылына күченеп килә. Тормыш иптәше Айсылу Ринат кызы белән күркәм йорт салып керәләр, Айгөл һәм Урал исемле балалар үстерәләр. Кызлары кияүдә, шәһәр­дә яши. 5 яшьлек уллары барлык сүзләрнең мәгъ­нәсен аңлап җитмәсә дә, әти­сенең җырларын тыңларга, буш вакытларында урамда футбол тибәргә ярата. “Балаларым – минем байлыгым, мин аларны бик яратам”, – ди Фәрит Миңлегәрәй улы.
Җырчы район һәм республика күләмендә үткәрелгән төрле чараларда да катнаша. Венер Килмөхәм­мәтовка багышланган конкурста 70тән артык кеше арасында башкорт халкының “Муел”җырын башкарып, Гран-при яулый. Үзешчән халык һәм эстрада җырларын башкару­чыларның “Юлдаш җыры-2013” ачык республика конкурсында икенче урынга лаек була һәм “Иң яхшы композитор” номинациясендә лауреат дип таныла. 2016 елда “Ике аккош” дип исемләнгән республика музыкаль конкурс-фкстивальнең Гала-концертында Салават Заһи­дуллин белән бергә “Инструменталь башкару” номинациясендә III дәрә­җә лауреат исемен яулыйлар. 2017 елда Бәхти Гайсинга багышланган республика баянчылар һәм гармунчылары республика конкурсында өченче урын һәм лауреат исеме ала.
Бүген Фәрит Миңлегәрәй улы оста итеп гармунда, баянда һәм синтезаторда уйный, республикада яшәп иҗат итүче автор­ларының сүзләренә көйләр яза, моңлы итеп җырлый һәм яшь музыкантларны өйрәтә. Ә киләчәктә үзенең альбомын чыгарарга хыяллана.
Милена Шәймәрдәнова.
Читайте нас: