Үзән
+23 °С
Болытлы
Барлык яңалыклар

Тормыш көтү – басу аша чыгу түгел

Зәйнәп Мөхәммәдьяр кызы Хәкимова 1928 елның 25 февралендә Иске Шәрәй авылында туган. Авыр еллар булуга карамастан, зур теләк белән укый һәм урта белем ала. Башка яшьтәшләренеке кебек, кызның язмышында Бөек Ватан сугышы тирән эз калдыра.

- Барлык ир-егетләр фронтка китеп беткәч, барлык авыр эш хатын-кызлар, балалар, инвалидлар һәм өлкән яшьтә­геләрнең иңе­нә төште. Колхоз тракторлары һәм атлар - барсы да фронтка озатылды. Шуңа да барлык эшләрне кул көче белән башкарырга туры килде. Тормыш шартлары авыр булуга карамастан, халык бер дә зарланмадымы – ачлык-ялангачлык, җиме­реклекне алар тыныч кына үткәрә белде, - дип хәтерли “1941-1945 елларда Бөек Ватан сугышындагы намуслы хезмәте өчен” медале белән бүләкләнгән ветеран.
Сугыштан соң Зәйнәп Хәкимова Уфа статистика техникумына укырга кереп, икътисадчы һөнәре алып чыга. 1950 елда юллама буенча Кырмыскалы авылының машина-исәп станциясендә эшли башлый. Биредә ул үзенең язмышын – райтопсбытта баш бухгалтер булып эшләп йөрегән Рифкать Хәки­мов­ны очрата. Өч ай дуслашып йөрегәннән соң егет кызга кияүгә чыгарга тәкъдим ясый. Матур гына яшәп китәләр. Гаилә­дә өч бала туа. Рифкать Сәетгәрәй улы Бөек Ватан сугышы ветераны, II дәрәҗә Ватан сугышы ордены һәм башка бик күп дәүләт наградалары кавалеры пенсиягә кадәр 539нчы санлы механикалаштырылган күчмә колоннада баш бухгалтер булып эшли.
Нинди авырлыклар аша үтүенә карамастан, Зәйнәп Мөхәммәдьяр кызының тормышында бәхетле минутлары да күп була. Ике кызы да педагогия университетын тәмам­лап, мәк­тәп­тә укытучы булып эшл­әде. Кызганычка каршы, ике ел элек өлкән кызы Халидә 67 яшендә фани дөньядан китеп барды. Артур исемле улы калды. Раушания пенсиядә, Күмертау шәһә­рендә яши. Ә аның кызы Диана Санкт-Петербург дәү­ләт аэрокосмик приборлар төзү университетын кызыл диплом бе­лән тәмам­лады, узган елда кияүгә чыгып, анда яшәр­гә калды. Улы Фир­дәүс Уфа дәүләт авиация-техник университетында инженер белгечлеге алып чыккан, газ участогында эшли. Лия һәм Линара исемле кызлары бар. Өлкәне - Уфа дәүләт нефть-техник университетында, ә кечесе мәктәптә 11нче сыйныфта укый.
Начальник урынбасары һәм өлкән икътисадчы бурычларын башкарып, Зәй­нәп Мөхәммәдьяр кызы башта машина-исәп стан­циясендә, соңыннан ра­йонның статистика бүле­гендә хезмәт сала. Хаклы ялга чыгуына карамастан, ул 64 яшенә кадәр эш­чән­леген дәвам итә. Хезмәт стажы аның - 42 ел. Озак еллар дәүләт статистика органнарында намуслы эш­ләгәне һәм бурычларын намуслы башкарганы өчен ул “Социалистик хезмәт отличнигы” билгесе белән бүләкләнә, шулай ук аңа “Хезмәт ветераны” исеме бирелә.
Милена Шәймәрдәнова.
Читайте нас: