Үзән
+9 °С
Болытлы
Барлык яңалыклар
Социаль аспект
6 февраль 2018, 12:04

Хатын-кызларга ярдәм йөзеннән

Уфа шәһәрендә авыр хәлгә дучар булып, меңнәрчә кешеләр янында үзен беркемгә дә кирәкмәгән итеп сизгән хатын-кызны җылы канат астына алырга әзер йорт бар. “Гаилә” республика ресурс үзәге дәүләт бюджет учреждениесендә эшләп килгән “Ана һәм бала” бүлекчәсе турында сүзебез. Бу йортта дөньяда япа-ялгыз калган, сынауларны күтәргәндә югалып калган, буыны ныгынып җитмәгәнлектән, бөгелеп төшкән хатын-кызларга дөрес юлга кире кайтырга, тормыш упкынынан чыгарга ярдәм итәләр.

Бер-бер артлы килгән каты сынаулардан сабыр канатлары шартлап сынганда, гаделлеккә ышанычы тәмам сүнеп, җанында соңгы тамчы өмет калмаганда шакый гүзәл зат бу йорт ишеген. Гаиләдә җәберләнүләргә, тукмалуларга арытабан чыдамыйча, балаларын җитәкләп чыгып киткән яки ире белән аерылу газабыннан йөрәк көче беткән, иң хәсрәтле мәл­ләрендә япа-ялгыз калып, тормышта интеккән хатыннар, кансызлык белән очрашудан җаны теткә­ләнеп, үз-үзенә кул салыр хәлгә җиткән яшь кызлар, йөкле хатыннар да сыену таба монда.
Бүлек җитәкчесе, социаль хезмәткәр, юрист, психолог һәрбер хатын-кыз белән аерым зур эш алып бара. Мәсәлән, кирәк икән, документлары тәртипкә китерелә, дәгъва кәгазьләре, гаризалар әзерләнә, оешмаларда, хокук саклау органнарында, судларда аның мәнфәгатьләре яклана. Үзенә җайлы эш табу, сабыйлары булса, аларны урнаштыру хәс­тәрлеген күрәләр, какшаган сәламәтлеген ныгыталар. Тән җәрә­хәтләре уңалган, җан яралары имгәнгән гүзәл затка әкренләп кенә яшәү гаме кайта, үзенә ышанычы арта.
Бу үзәктә хатын-кызларга вакытлыча яшәү, балалары белән аралашу өчен якты җылы бүлмә­ләр җиһазлан­дырылган, уңайлы шартлар тудырылган. Монда алар ике айга кадәр яши ала.
Хатын-кызлар үзләре килә алмасалар, эш көн­нәрендә 8 сәгать 30 минуттан 20.00га кадәр 8 (347) 286-02-53 телефонына, live:wowendom скайбына шалтырата ала. Шулай ук үзләре теләгән вакытта [email protected] адресы буенча яза, www.семья.рф порталында белгеч­ләргә сораулар калдыра алалар.
2017 елның эш нәти­җәләре буенча хатын-кыз­ларга ярдәм итү бү­легенә, гомумән, гаилә­ара мөнәсәбәтләре какшаган, яшәү чыганаклары булмаган, психологик, хокукый ярдәмгә мохтаң 1792 кеше мөрәҗәгать иткән. 40 хатын-кызга, 50дән артык балага стационар шартларда социаль ярдәм күрсә­телгән.
“Гаилә” республика ресурс үзәгенең адресы: Уфа шәһәре, СССРның 50 еллыгы урамы, 27нче йорт, 1нче корпус. Консуль­тациягә язылу телефоны: 8(347) 286-02-53.
Илүсә Идрисова,
Үзәкнең директоры.
Читайте нас: