Өлкән яшьтә дә сәламәт яшәү мөһим

Өлкәннәр еш кына буыннары сызлау, йөрәк-кан тамырлары белән интегүләре, күзләренең начар күрүе, колакларының начар ишетү­ләренә зарланалар. Шуңа да, социаль хезмәткәр бу яшьтәге кешеләрнең психологик үзен­чәлекләрен белергә тиеш. Бу аларга үз эшләренең асылына төшенергә, олы яшьтәгеләр белән уртак тел табарга, хәлне дөрес бәһаларга һәм проблеманы дөрес хәл итәргә булышлык итә.

Яшәгән саен кешеләр үз сәламәтлеге турында ешрак уйлана башлый, шуңа күрә күпләре спорт белән шөгыль­ләнергә карар итә. Ә физик күнегүләрне башкара алмаганнар күңелләренә ошаган, кәефне күтәрә торган мавыгу таба. Мәсәлән, Сахай авылында яшәүче 95 яшьлек Х.С.Хәсәнова моңа ачык мисал. Хәдичә Сабирҗан кызы катлаулы кроссвордлар чишә, моңа ул вакытының күп өлешен бүлә. Ни генә дисәң дә, баш миенең эшчәнлеген, хәтерне яхшырту өчен бер дигән күнегү ул.

Кырмыскалы авылында яшәүче Ә.М.Нурышев, I төркем инвалид булуына карамастан, кул кушырып утырмый, тормышына да зарланмый. Әхәт Мидхәт улы ясаган сувенирлар һәм картиналар аның үзенә дә, тирә-яктагыларга да шатлык һәм җылылык бүләк итә.

Прибельский авылынннан 1937 елгы С.Ш.Галиуллина бакчасында эшләргә, анда тәртип булдырырга ярата. Җәй көне Сания Шәмсетдин кызы­ның йортына барып, андагы матурлыкны, чәчкәләр­ненең күплеген күреп, хәйран калып кайттык.

Йортларында социаль хезмәт белән файдаланучы бик күпләрне мисал итеп ките­рергә мөмкин. Алар ярдәмгә мохтаҗ булсалар да, күңел­ләренә хуш килгән эшләре бар.

Хәрәкәттә - бәрәкәт, ди­ләр. Көненә 8 минут спорт белән шөгыльләнү дә гомерне озынайта, дип исбатлый галимнәр. Мәсәлән, Бишаул-Уңгар авылыннан Әлфия Баязит кызы Хәйретдинова да бу киңәшләргә колак сала – кыш көне чаң­гыда шуа, скандинавия таяклары белән дә йөри. Бу күнегүләрнең файдасы аеруча зур – алар организмны кислород белән баета, кан әйләнешен көчәйтә.

Мондый мисаллар бихисап ки­терергә мөмкин. Кызыксынучан һәм сәламәт­лекләрен кайгырткан кешеләр үрнәгенә башкалар да иярер, дип ышанасы килә.

Альмира Хәкимова, “Таң” үзәге директоры.