Җиңүләр дәртләндерә

Читтән дүрт команда бу уенда катнашырга теләк белдерде һәм турнирны тулыландырып җибәрде. Мавыктыргыч алышта җиңү яулау өчен спортчылар барлык көчен салды. Уфа шәһәренең “Феникс” командасы турнирның җиңүчесе дип танылды. “Карлыман” командасы икенче урынга күтәрелсә, Кырмыскалы авылының Балалар һәм үсмерләр спорт мәктәбе командасы өченче урын яулады. Шәхси номинацияләрдә “Карлыман” командасыннан Марат Ша­һиев – иң яхшы капкачы, Балалар һәм үсмерләр спорт мәктәбеннән Эдуард Грачев – иң яхшы сакчы һәм “Феникс” командасыннан Ва­дим Галкин иң яхшы һөҗүм итү­че исемнәренә лаек булдылар.

Арытабан 2004-2005 елгы үсмерләр арасында мини-футбол буенча БР беренчелегенең тәүге туры үткәрелде. Уенга бик күп көярмәннәр җыелды һәм аларның һәрберсе спортчыларга көч биреп торды. “АЛГА-Кырмыскалы” ко­ман­дасы зур аерма белән “Зенит-1” командасын җиңүгә (5:1) иреште. Көндәшләренең капкасына Азамат Якупов - өч, ә Илгиз Садыйков ике гол кертте. “Зенит-2” командасы белән очрашуда “АЛГА-Кырмыскалы” командасы шулай ук яхшы нәтиҗә күрсәтте – капкага алты туп кертте. Уен 6:2 исәбе белән тәмамланды. Илгиз Садыйковның - дүрт, Азамат Якупов һәм Денис Басый­ровның исәбендә берәр туп. Ә менә “Зенит” ның ике командасы да “Кырмыскалы-Виктория” ко­манда­сыннан көчлерәк булып чыкты.

Беренчелекнең икенче туры киеренке шартларда үтте, чөнки ике команда уенчылары, шулай ук көярмәннәр дә фәкать җиңүгә өмет итте. Безнең “АЛГА-Кыр­мыс­калы” командасы Уфа шәһә­ренең 31нче урта мәктәбенә каршы уйнады һәм аларны 7:1 исәбе белән тар-мар итте.

Шул ук көнне “Кырмыскалы-Виктория” кызлар командасы Неф­текаманың “Саманта” (3:7) һәм Уфа шәһәренең 31нче санлы урта мәктәбе (4:7) командалары арасындагы уенны да начар дип әйтеп булмый. Кертелгән голлар­ның дүртесе - Глафира Жукова, ә өчесе Дарья Сорокина исәбендә.

“АЛГА-Кырмыскалы” һәм Нефтекаманың “Саманта” командалары арасында уен 4:4 исәбе белән тәмамланды. Илгиз Садыйков һәм Рөстәм Гусейнов икешәр гол кертүгә иреште. “Кыр­­­­мыс­­калы-Виктория” кызлары һәм “АЛГА-Кырмыскалы” егетләре арасындагы алыш кызу барды. Уен егетләр файдасына 10:6 исәбе белән тәмамланды.

Урта төркемдәге икенче турда 2005-2006 елгы малайлар һәм 2003-2005 елгы кызлар катнашты. Пьедесталдагы урын өчен Кабак, Константиновка, Прибельский һәм Кырмыскалының ике командасы көрәште. Киеренке уеннарда беркем дә җиңүне көндәшләренә би­рергә теләмәде. Нәтиҗәдә, мәйдан хуҗалары исәп буенча зур аерма белән алга чыкты. Кыр­мыска­лы­ның тренер Фәнис Габдуллин җи­тәк­челегендәге “Виктория” һәм “АЛГА-Кырмыскалы” командала­ры, туры килүенчә, «алтын» һәм «көмеш» яулады. Ә Кабак авылы­ның Зәки Бикбаев җитәкчелеген­дәге ко­мандасы өченче урында.

Берничә көн дәвамында барган турнир уенчылар һәм тренер­ларның күңеленә хуш килде. Барысы да кызыклы уеннардан канәгать калдылар һәм тагын да шундый турнирлар оештырырга кирәк, дигән фикергә килделәр.

Марсель Рәшитов.