Үзән
+29 °С
Болытлы
Барлык яңалыклар
Тантана
18 гыйнвар 2019, 13:12

Без дусларыбыз белән көчле!

Йола буенча, Русия матбугаты көне уңаеннан урындагы мәгълүмат чаралары – гәзит һәм телевидение хезмәткәрләре җыелышып, узган елга йомгак ясый, киләсенә бурычлар билгели. Бу юлы да район Мәдәният сараеның кече залына район гәзите редакциясе хезмәткәрләре журналистика ветераннарын, ел дәвамында гәзит битләрен үзләренең материаллары белән баетып торган активистларны, матбугат кампаниясен үткәрүдә төрле яклап ярдәм күрсәткән иң якын дусларын җыйды. Һөнәри бәйрәм уңаеннан оештырылган чара тәбрикләүләрдән тыш, гәзитебезне тагын да укылышлы, кызыклы итү өчен тагын ниләр эшләргә, тиражларны ничек арттырырга кебек сорауларга бергәләп җавап эзләү максатын да күз уңында тотты. Шунысын әйтергә кирәк, бу очрашу без көткәннән дә кызыклырак, мәгънәлерәк килеп чыкты.

Сафлар арта

Матбугат көне уңаеннан оештырыл­ган чара районның башлангыч журналистлар берлеге утырышыннан башланып китте. Бу оешма районда байтак еллар дәвамында эшләп килә. Һәм, әйтергә кирәк, республикада составы буенча ул иң күп санлысы – безнең районның 18 кешесе РФ һәм БР Журналистлар берлеге әгъзасы булып тора. Агымдагы елда тагын җиде кеше Берлеккә керергә теләк белдерде. Башлангыч оешма рәисе Әлфия Шәрәфиева узган ел эш-чәнлегенә йомгак ясап, берлектәге журналистлар төрле бәйге­ләрдә катнашып, һәртөрле чараларда көчләрен сыный, призлы урыннар яулый, болар, әлбәттә, шатлыклы һәм килә­чәккә өметле күренеш, дип билге­ләде. Узган елда яңа китаплары басылып чыккан Рәмилә Сәйфуллина, Фәргать Котлыбаев һәм Риф Йөзлекбаев та ихлас котлаулар кабул итте.

Уңышка алган юнәлеш

Чараның икенче өлеше дә җылы һәм тантаналы шартларда үтте. Кырмыскалы мәгълүмат үзәге баш мө­хә­р­­­­­ри­ре Р.Р.Шәй­­бәков җыелучыларны бәй­рәм белән котлап, изге теләкләрен һәм хезмәттәшләренә рәхмәт сүзләрен җиткерде. Узган елга йомгак ясап, уңышларга аерым тукталып үтте.

- Басмалар Русия матбугаты грантына ия булды, журналистлар югары наградалар алды, кышкы матбугат кампаниясе нәтиҗәле үтте, рус телендәге гәзитнең сайтына керүчеләр саны 20 меңнән артып китте. Бу коллективның, активист­лар­ның, почта хезмәткәрләренең бердәм эше, киләчәктә дә алган юнәлеш буенча тырышып эшләргә кирәк, - диде Ринат Рәмил улы.

Залда җыелучыларны Русия матбугаты көне белән котларга муниципаль район хакимияте башлыгының социаль мәсь­ә­ләләр буенча урынбасары Ф.Н.Ма­кеева да килгән иде.

- Нәкъ журналистлар авыллардагы халык белән элемтәдә тора, проблемаларын яктырта, шатлыклары белән уртаклаша. Әлбәттә, матбугат басмаларын бүген, башлыча, өлкән буын кешеләре укый. Ә яшьләр барлык мәгълүматны гәзит сайтларыннан һәм социаль челтәрдән ала. Шунысы куанычлы, яшь мөхәррирләр төрле аудитория белән аралашуның яңа ысулларын таба, - диде Флизә Наил кызы.

Һәрвакыт элемтәдә булырга

Редакциягә төрле авыллардан хәбәрләр килеп торуы ул матбугатка заман сулышы бирә, аны җанландырып җибәрә, эчтәлеген кызыклырак итә. “Кармаскалинская новь” гәзитенең дубляжы булуга карамастан, “Үзән”нең үз йөзе, үз сүзе, үз авторлары бар. Хезмәт кешеләре, күпбалалы һәм олы тормыш юлы үткән үрнәкле гаиләләр турында материаллар, шигырьләр, юморескалар, хикәяләр гәзитебез битләрендә еш басыла. Бәйрәм уңаеннан иң актив хәбәрчеләребезне дә котлап уздык. Мәсәлән, РФ һәм БР Журналистлар берлеге әгъзасы, республиканың атказанган мәдәният хезмәткәре Мидхәт Гандәлиф улы Рәҗәпов тарихи материаллары һәм гади авыл эшчәннәре турындагы мәкаләләре өчен “Ел лауреаты” исеменә лаек булды. Бу исемлектә Иске Кыешкы авылында яшәүче мәгариф ветераны Зәлифә Хөрмәтулла кызы Гаделшина да бар. Ул барлык гомерен балаларга белем һәм тәрбия бирүгә багышлаган. Күптән хаклы ялда булуына карамастан, тормыш иптәше Рәмил Җәмил улы белән актив тормыш алып баралар. Авылда, урындагы мәктәптә узган барлык чараларда катнашалар. “Хәтирә” фольклор ансамбле әгъзалары. Шул ук вакытта Зәлифә Хөрмәтулла кызы авылдашлары, мәктәп тормышы, укытучылар турында да матур-матур мәкаләләр язып, район гәзите редакциясенә җибәрергә вакыт таба.

Бу мактаулы исем Кабак авылында яшәүче Балалар һәм үсмерләр спорт мәктәбе тренеры, физкультура укытучысы, Шәй­моратов исемендәге “Йолдыз” хәрби-патриотик клуб җитәкчесе Зәки Әхмәт улы Бикбаевка да бирелде. Әйткәндәй, ул “Ел тренеры” номинациясендә дә билге­ләнеп үтте.

Киләсе лауреат – күре­некле шагыйрь, БРның атказанган мәдәниянт хезмәткәре – Рамил Мотаһар улы Чурагулов. Иҗат җимешләре белән уртаклашудан тыш, ул матбугат кампанияләрен оештыруга да зур өлеш кертә. Гәзит укучыларыбыз арасында уйнатылган ике телевизор да – аның бүләге.

Мактау грамоталарына ия булган Нэлли Зарипова – сәла­мәтлек, Вадим Канбәков - спорт, Руслан Зиннәтуллин, Зөлфия Кашапова – авыл хуҗалыгы, Илдус Хәмитов – янгын хезмәте, Артур Морзабаев – эчке эшләр органнары эшчәнлеге белән таныштырып торды, Эльвира Байбулатова – Бозаяз авыл биләмәсе, Эльвира Баязитова – Пионерлар һәм укучылар йорты, Айгөл Килмөхаммәтова – район үзәк китапханәсе, Рәшидә Гыймаева һәм Елена Сагадиева – Үсмерләр техник иҗат үзәге эшчәнлеген даими яктыртып бардылар. Татар теле һәм әдәбияты укытучысы Гүзәлия Гыйззәтуллина Иске Акташ авылындагы барлык чаралар турында язып, гәзит битләрен эчтәлекле мәкаләләре, тормышчан хикәяләре, хисләргә бай шигырьләре белән бизәп барды. Таһир Вилданов редакция эшен үз җилкәсендә татыган кеше. Район гәзите белән хезмәттәш­лек итә башлавына да ничә дистә еллар үткәндер?! Хикәяләре, юморескалары китап-китап булып дөнья күрүенә карамастан, ул яңадан-яңа, бүгенге тормышыбызга кагылышлы әсәр­ләрен иҗат итеп, гәзитебезгә юллап тора. Риф Йөзлекбаев – “Үзән” гәзитен адыручылар­ның йөрәк­ләрен мавыктыргыч хикәяләре, тормышчан повестьлары, хис­ләргә бай шигырьләре белән яулаган билгеле автор. Венера Латыйпова өчен узган ел вакыйгаларга бай булды. Байтак ши­гырь­ләр авторы берничәсенә үзе көй язып, җырларын сәх­нәгә чыгарды һәм үзе үк башкарып та ишеттерде. Лена Әми­­неваның да шигырьләре, җыр­лары белән гәзит битлә­рендә, интернет челтәрендә даими танышып барырга мөм­кин. Иске Муса авыл Сове­тының башланыч ветераннар оешмасы рәисе Фә­нүзә Йосыпова безне авыллардагы хәл-вакыйгалар белән таныштырып торды. Барлык гомерен авыл хуҗалыгына багышлаган, мактаулы исем­нәргә лаек булган Әфкать Нигъмәтуллин - безнең даими кунагыбыз. Ул редакциягә буш кул белән килми: ниндидер чарада катнашуы, яисә үткәрелүе турында түкми-чәчми сөйләп, бу сүзләрнең гәзит битләрендә урын алуына ирешә. Урындагы мәчетнең имам-хатибы буларак, гәзит битләрендә дин темасын яктыртуда даими ярдәм күрсәтә.

Сәлимә Хафизова үзен борчыган мәсьәләләрне шигырь юлларына сала. Һәм алар бик мәгънәле, гыйбрәтле килеп чыга. Бер килүдә шигырь­ләрен алып килсә, икенче килүендә хикәя, юмореска калдырып китә. Үзенең яки авылдашларының тормышында булган кызыклы хәл­ләр турында язарга ярата ул. Мәдәният хезмәткәре Миң­нифа Батталова халкыбызның йолалары, гореф-гадәтләре турындагы мәкаләләре һәм шигырь­ләре өчен бүләкләнде.

Ярдәмегез өчен рәхмәт!

Кулга-кул тотынышып эш­ләгән почта хезмәткәрләре дә бәйрәмнән читтә калмады. Ни генә дисәң дә, матбугат кампаниясе барышында алар да күп көч сала. “Кармаскалинская новь”, “Үзән”, “Даи­рә” гәзит­ләрен яздыруда иң яхшы күр­сәткечләргә иреш­кән Олыкүл авылы хат ташучысы Галина Кирилловна Конькова, Иске Муса почта элемтәсе бүлеге начальнигы Нәфисә Рамазан кызы Абдрахманова һәм Иске Бәбеч авылыннан Рәйсә Фәрит кызы Халитовага Рәхмәт хатлары һәм истәлекле бүләкләр тапшырылды.

Матбугат кампанияләрен үткәрүдә зур ярдәм күрсәткән иганәчеләребез - “Йоматау” шифаханәсе директоры А.И.Степ­­ков, “Кармаска­линск­сельхоз­энерго» җәм­гыяте генераль директоры Ф.Г.Мөхәммәт­җановка, «Евро Грейт» һәм «Стенд Мастер» җәмгыятьләре җитәкчеләре И.И.Гайнетдиновка һәм Р.Г.Ис­­ламовка, шәхси эшкуар З.Р.Пуховага һәм башкаларга чиксез рәхмәтлебез.

Телевизор үз иясен тапты

Бәйрәм чарасының ахыры да бик кызыклы килеп чыкты - гәзиткә язылучылар арасында Рамил Чурагулов биргән телевизор һәм башка бүләкләр уйнатылды. Бу юлы төп бү­ләккә Күлләр авылында яшәү­че Мәрь­ям Вәлитова ия булды. Шәхси эшкуар Р.И.Кә­римовның бүләге – 19 литрлы 5 баллон “Сестрица» суы Иске Бәбеч авылыннан Фидалия Абдуллинага чыкты. “Кузнечный двор”да эшләнгән мангал Яңа Акташ авылыннан Илдар Динисламовка китә. Бүләк­ләребез моның белән генә бетми әле. “Бәхетле Авто” акция­се һәм “Үзән” гәзитенә язылу­чылар арасында өстәмә бүләк­ләр гыйнвар азагында уйнатылачак.

Йолага әверелгән чара бу юлы да җылы, дустанә шартларда үтте. Ул очрашу, аралашу шатлыгы бүләк итте. Без дә бу көнне кунаклар тарафыннан әйтеләгән уй-фикерләр, теләк-тәкъ­дим­нәрне кертеп, гәзи­тебезне тагын да укымлылырак, чагурак һәм кызыклырак итү өчен барлык көчебезне салачакбыз. Иң мө­һиме, бергә булыйк, бердәм булыйк, дуслар!

Эльвира Ямалетдинова.
Читайте нас: