Төзекләндерү – уртак эш

Камышлы авыл клубына җыелучылар алдында урындагы биләмә башлыгы И.В.Биккузин, муниципаль район Советы секретаре А.Ф.Сабиров, муниципаль район хакимияте башлыгының икътисадый мәсьәләләр буенча урынбасары А.С.Әнәсова, шулай ук урындагы башлангычларны хуплау программасы буенча консультант Е.А.Капралова чыгыш ясады.
Елена Александровна авыл халкын бу проектны гамәлгә ашыру барышы белән таныштырды.
- Республика хөкүмәте һәм Бөтендөнья банкы белән берлектә тормышка ашыручы урындагы башлангычларны хуплау программасы 2014 елның азагында ук старт алган иде, узган елдан башлап ул республика биләмәләрендә эшли башлады. Проектның максаты – авыл халкын борчыган проблемаларны ачыклау һәм хәл итү. Алар су белән тәэмин итү, авыл эчендәге юлларны, күперләрне, мәдәният йортларын, балалар мәйданчыкларын төзекләндерү һәм авыл вәкаләтенә кагылышлы башка сораулар булырга мөмкин.
Гомумән, агымдагы елда республикага анык максаттан файдалану өчен дәүләттән 300 миллион сум акча бүленә. Һәр авыл биләмәсе 1,5 миллион сумга кадәр бер заявка җибәрә ала, ләкин программада катнашу һәм бу акчаларны алу өчен берничә мотлак шартлар үтәлергә тиеш. Асылда, гражданнар җыенында халык үз биләмәсендәге шактый әһәмиятле проектны билгеләп, аны финанслау өчен үзе дә катнашырга, ягъни акчаларның бер өлешен үзләре җыярга, шулай ук бу эшкә урындагы эшкуарларны җәлеп итәргә тиеш. Калган чыгынар урындагы бюджеттан финанслана.
- Узган елда бу программада районның 16 авыл биләмәсе катнашты, нәтиҗәдә, 8 авыл Советы конкурсны үтте. Димәк, аларның проектлары агымдагы елда гамәлгә ашырылачак.
Кызганычка каршы, калганнар программага керми калды, ләкин агымдагы елда аларның янә катнашу мөмкинлеге бар. Бу инде авыл халкының үзләренең инициативасыннан тора. Шуны да истә тотарга кирәк, республика буенча проектта катнашучыларның саны артты, - дип белдерде Альфир Фәрхәт улы.
Рәсми өлештән соң җыелган халыкның тәкъдимнәре тыңланды. Тавыш бирү юлы белән Камышлы авылының Мәктәп урамындагы юлын ремонтларга дигән карар хупланды. Шулай ук җыелыш барышында халыкның мәнфәгатьләрен яклаучы инициатива төркеме сайланды.