Үзән
+18 °С
Болытлы
Барлык яңалыклар
Авыл биләмәләрендә
14 август 2018, 12:53

Бердәм көч белән

Җәй җитү белән Иске Акташ авылы бала-чагаларның шатлыклы тавышлары белән тула. Биредә яшәүчеләр дә, каникулда туганнарына, нәнәй-картәтиләренә кунакка кайтучылар да күп.

Интернет челтәрендәге Иске Акташ төркемендә авыл халкы бик күп көнүзәк проблемаларны хәл итү юлларын эзли. Шулай беркөнне балалар өчен уен мәйданчыгы төзергә дигән карарга киләләр.
Икенче көнне үк актив кешеләрдән торган төркем мәйданчык төзү урынын сайларга җыела. Авыл Советы хакимияте белән килешенгәч, авыл уртасында урнашкан кибет янында таган, карусель, комлык һәм балалар өчен башка кирәк-яраклар урнаштырырга, дигән карарга киләләр. Моның өчен мәчет тә акча бүлә.
Барсы да дәртләнеп эшкә тотына. Авыл старостасы Марат Сәйфуллин һәм Нияз Суфиянов техника алып килә, Виктор Юрьев үзенең триммеры белән чүп үләннәрен чаба. Покрышкаларны мәйданчыкның чикләренә казып утырталар.
Комлык ясауны Илдар Ибраһимов үз өстенә ала. Ә комны Агыйдел елгасы буеннан ташыйлар. Рәзим Әхмәтшин, Заһит Исламголов, Фәнзил Шафиков эретеп ябыштыру эшләре белән шөгыльләнә – балалар өчен хәвефсез булган материаллардан төрле уен кирәк-яраклары ясала. Альбина Нуриева һәм укытучы Гүзәлия Гыйззәтуллина буяу һәм пумала алып килеп, кибетнең ян стенасын кояш һәм чәчкәләр белән бизи. Иске коймаларны ир-егетләр тигезләп, төзәтеп куйган.
Авыл халкы Нияз Суфиянов, Айрат Мөхтәруллин, Габдулхай Гыйззәтуллин, Самат Таһиров, Илнур Сөләйманов, Зим­фир Исламголов, Марсель Сәфи­уллин, Фәнис Йөзлекбаев, Айгизә Светлакова, Айгөл Суфиянова, Гөлназ Мөх­тәруллина, Рузилә Галиуллина, Наилә Фәхретдинова, Алина Исламголова, Альфира Галиуллина, Инна Юрьева, Рәм­зия Хәкимова, Сәвия Шафикова, Ли­лия Кәримова, Анастасия Галиулли­на, Фирдәүсә Йосыповага һәм балалар мәй­данчыгы ясауда зур ярдәм күрсәт­кәннәрнең һәрберсенә рәхмәт белдерә.
Марсель Ишморатов.
Читайте нас: